Ministri i Punëve të Jashtme të Serbisë, Ivica Daçiq duke komentuar fletarrestimin e Interpolit për ish-nënkryetarin e Listës Serbe, Milan Radoiçiq, ka thënë se është e pamundur ekstradimi i Radoiçiqit në Prishtinë, transmeton InLajmi.
“ E ka thënë edhe presidenti Vuçiq se hetimet kundër Radoiçiqit janë duke vazhduar dhe të gjitha proceset gjyqësore do të zhvillohen para gjykatave vendore”, tha ai.
I pyetur nëse kryeministri i Kosovës Kurti është i vetmi fajtor për të gjitha problemet me të cilat ballafaqohet komuniteti serb dhe se qeveria në Beograd e kryesuar nga presidenti Vuçiq nuk mban asnjë përgjegjësi, Daçiq tha se qeveria e Albin Kurtit është fajtore për të gjitha, problemet e serbëve në Kosovë, por edhe të ish-kryeministrave të Kosovës që nuk e zbatuan marrëveshjen e Brukselit.
“Përgjegjësi është edhe bashkësia ndërkombëtare, e cila mendon se mund të na mashtrojë duke nënshkruar Marrëveshjen e Brukselit. Ata tani thonë se nuk ka zbatim të Marrëveshjes së Brukselit pa njohjen paraprake të Kosovës së pavarur. Kjo është e papranueshme për ne”, theksoi ai, shkruan Danas.rs.
I pyetur për të përmendur vetëm një interes kombëtar që Qeveria e Serbisë ka përmbushur për komunitetin serb në Kosovë në 10 vitet e fundit, Daçiq tha se qeveria serbe kurrë nuk do ta nënshkruajë pavarësinë e Kosovës.
