Kryetari i Partisë Demokratike të Kosovës Memli Krasniqi, ka shprehur shqetësim e tij për mënyrën e ndarjes së projektligjit buxhetor nëpër komuna, të cilin e quajti si diskriminimin më të egër institucional ndaj qytetarëve në historinë e Kosovës, përcjell InLajmi.
Ai tha se për 4 komuna që udhëhiqen nga Partia Demokratike e Kosovës, Ferizajn, Skënderajn, Kaçanikun e Hanin e Elezit, nuk është ndarë asnjë cent.
Krasniqi tha se kjo qasje e Qeverisë kundër qytetarëve të komunave të cilat nuk i drejton partia në pushtet është shantazh i ulët politik.
Tutje kryetari i PDK-së i bëri thirrje deputetëve të VV-së krahas atyre të opozitës, që me votën e tyre të mos e vulosin këtë propozim diskriminues të Qeverisë.
Postimi i plotë i tij:
Derisa për 4 komunat që udhëhiqen nga Lëvizja Vetëvendosje, Qeveria ka ndarë më shumë se gjysmën e buxhetit për investime të reja kapitale për vitin 2024, për 4 komuna që udhëhiqen nga Partia Demokratike e Kosovës, Ferizajn, Skënderajn, Kaçanikun e Hanin e Elezit, nuk është ndarë asnjë cent.
Gjilani, Shtimja, Kamenica dhe Podujeva përbëjnë 11.6 % të popullsisë së Kosovës, ndërsa u është ndarë 59.5 % e buxhetit për investime të reja kapitale.
Ndërkaq, për të gjithë të tjerët, që janë 88.4 % e popullsisë, Qeveria ka ndarë vetëm 40.5 % të këtij buxheti.
Ky është diskriminimi më i egër institucional ndaj qytetarëve në historinë e Kosovës, që prej çlirimit të vendit tonë.
Kultura politike në Kosovë ka nevojë të shtensionohet e të rritet bashkëpunimi, jo të instalohet kjo kulturë e hakmarrjes dhe diskriminimit.
Kjo qasje e Qeverisë kundër qytetarëve të komunave të cilat nuk i drejton partia në pushtet është shantazh i ulët politik.
Unë ftoj edhe deputetët e Vetëvendosjes, krahas atyre të opozitës, që me votën e tyre të mos e vulosin këtë propozim diskriminues të Qeverisë.
Është e turpshme dhe e papranueshme të votohet për një buxhet të tillë. /InLajmi/
