Kultivuesi grek i ullirit Panagiotis Tsafaras është detyruar të kontrollojë kopshtet e tij 2 herë në ditë kohët e fundit për të shmangur hajdutët që përpiqen të vjedhin të korrat ndërsa çmimet rriten gjatë një korrjeje të dobët.
Tsafaras është grabitur 2 herë, ku hajdutët i kanë vjedhur më shumë se një ton ullinj muajin e kaluar.
Prodhuesit e tjerë në të gjithë vendin kanë marrë masa më ekstreme, duke instaluar kamera dhe gjurmues GPS në pemë, si dhe duke marrë në konsideratë marrjen e sigurisë private.
“Është hera e parë që po ndodh. Ne kurrë nuk e kishim përjetuar këtë në rajonin tonë. Unë jam i detyruar të jem polic, roje, pronar, duhet të bëj gjithçka, sepse ne nuk i rrethojmë pronat tona, kultivojmë gjithë vitin, shpenzimet janë të shtrenjta, dhe kur vjen koha e korrjes, ata synojnë pemët duke vjedhur gjithë mundin tonë.”
Tsafaras, 63 vjeç, i ka korrur ullinj gjatë gjithë jetës së tij në qytetin bregdetar Filiatra në gadishullin jugor të Peloponezit. Ai shprehet se hajdutët më së shumti qarkullojnë natën dhe përdorin mjete të forta për si sharrë apo sopatë për të prerë pemët dhe më pas i ngarkojnë në kamionë. Për të mos u kapur ata nxjerrin vajin në zona të ndryshme nga rajoni në të cilin është vjedhur prodhimi.
Policia greke konfirmoi për Reuters se ka një rritje të vjedhjeve të ullinjve dhe vajit të ullirit në të gjithë vendin këtë vit.
“Ne do të detyrohemi të vendosim kamera, do të detyrohemi të vendosim GPS në pemë dhe ndoshta do të duhet të gjejmë dikë dhe ta paguajmë atë një roje sigurie, për të kryer patrullimet me një automjet. Kemi shumë ndryshime në prodhimin tonë, për shkak të ndryshimeve klimatike. Shumë shi, periudha të zgjatura thatësire, dhe kjo si rezultat shkakton një rritje të madhe të çmimeve të vajit (ullirit). Nëse kjo vazhdon, do të kemi këtë fenomen.”
Greqia është prodhuesi i tretë më i madh në botë i vajit të ullirit pas Italisë dhe Spanjës, të cilat kanë parë incidente të ngjashme. E njohur si “ekstra e virgjër”, vaji i ullirit grek është veçanërisht i kërkuar për cilësinë e tij të lartë.
“Masa që mund të marrim është që të mbledhim sa më shpejt ullinjtë, që hajdutët të mos kenë mundësi të na i vjedhin dhe të vizitojnë arat herë pas here, sepse nuk mund të jemi gjatë gjithë kohës në ara.”
Rënia e prodhimit ka dyfishuar çmimet e shitjes me shumicë të vajit të ullirit në 8-9 Euro për litër. Çmimet e shitjes me pakicë kanë arritur deri në 14 Euro, duke e bërë këtë kulture një objektiv tërheqës për hajdutët.
Filiatra, e cila krenohet me një kullë të ngjashme 26 metra të lartë në hyrje të saj, është një qytet i qetë në një fushë pjellore me 5 milionë pemë që kontribuojnë 10-12% të prodhimit të ullinjve të Greqisë transmeton Klan HD.
Panagiotis Foudas një pronar që zotëron një fabrikë vaji ulliri në këtë zonë shprehet se raportet për vjedhje e kanë detyruar tashmë atë dhe partnerin e tij të biznesit të ndërmarrin veprime.
