Ehat Miftaraj, drejtor ekzekutiv i Institutit të Kosovës për Drejtësi, gjatë tryezës ku u prezantua raporti i IKD-së me titull “Kushtetutshmëria në qeverisje”, tha se moszbatimi i vendimeve të Gjykatës Kushtetuese, nuk është vepër penale.
“A është vepër penale moszbatimi i vendimeve të Gjykatës Kushtetuese, tash kur e kemi hartu Kushtetutën kur na kanë ndihmu partnerët ndërkombëtarë, ata kanë mendu që kemi me themelu institucione demokratike, qoftë në nivel qendror, qoftë nivel lokal, nuk e kontestojnë, domethënë zbatimin e vendimeve kushtetuese edhe nuk është fare si vepër penale në Kod Penal moszbatimi i vendimeve të Gjykatës Kushtetuese, është si vepër penale vetëm te gjykatat e rregullta”, tha Miftaraj.
Ndërsa Përparim Gruda, koordinator i Departamentit të Drejtësisë në PDK, tha se nëse dëshirojnë ta bëjnë vepër penale moszbatimin e vendimeve të Kushtetuese dhe ky do të ishte propozim i drejtë për shkak të realitetit që po shihet.
“Nëse na dojmë me bo vepër penale moszbatimin e vendimeve që mendoj që është propozim i drejtë për shkak të realitetit që po e shohim, unë mendoj që neve na duhet një amendament kushtetues. Unë nuk jam për variantin që përmes Kodit Penal na me shku direkt edhe me thanë që kjo është vepër penale sepse do të ishte ushtrim i një lloj pushteti konstituiv”, tha Gruda.
Në anën tjetër deputeti i AAK-së, Pal Lekaj, tha se ligjet nuk duhet vetëm të krijohet por edhe të zbatohen.
“Ligjet nuk bëhen vetëm sa për të krijuar një ligj, por që të jenë të zbatueshme dhe në interesat e qytetarëve”, tha ai.
Lekaj i përgëzoi organizatat joqeveritare për organizimin e tryezës në “Javën Kundër Korrupsion 2023”.
“Unë ju përgëzoj për një tryezë të tillë, për një qasje të tillë duhet vlerësuar nga i gjithë spektri politik, e sidomos atyre që e kanë përgjegjësinë që është qeveria dhe mazhoranca”, tha deputeti gjatë diskutimit.
Ndryshe, Instituti i Kosovës për Drejtësi, me përkrahje të Departamentit të Shtetit Amerikan Byrosë për Çështje të Narkotikëve Ndërkombëtarë dhe Zbatimit të Ligjit, të mërkurën organizoi tryezën ku u prezantuan raporti me titull, “Kushtetutshmëria në Qeverisje” raportë ky që është si rezultat i monitorimit sistematik që IKD i bën sistemit të drejtësisë, shkruan BetimipërDrejtësi
Ky raport u publikua në kuadër të “Javës Kundër Korrupsion 2023”, e cila organizohet nga Koalicioni i Organizatave të Shoqërisë Civile, i përbërë nga Instituti i Kosovës për Drejtësi, Lëvizja FOL dhe Iniciativa për Progres, me moton “Bashkë kundër korrupsionit”.
