Fondi Kosovar për Garanci Kreditore FKGK dhe Agjencia Suedeze për Zhvillim e Bashkëpunim Ndërkombëtar SIDA nënshkruan marrëveshjen e garancisë në vlerë prej 14.9 milionë euro, me ç’rast u tha se kjo marrëveshje është në të mirën e ekonomisë së vendit, raporton InLajmi.
Kjo marrëveshje u tha se është pjesë e përkushtimin e institucioneve për të nxitur rritjen ekonomike dhe qëndrueshmërinë në Kosovë me mbështetjen e vazhdueshme të SIDA-s.
Kryesuesi i Bordit të FKGK-së, Agan Azemi, pas nënshkrimit tha se bashkëpunimi me SIDA-n ka filluar qysh në vitin 2018 me marrëveshje fillestare në vlerë 10 milionë euro.
“Marrëveshja e nënshkruar sot shënon bashkëpunimin tonë të dytë me SIDA-n që nga viti 2018, kur marrëveshja fillestare me vlerë 10 milionë euro u realizua me sukses duke mundësuar kredidhënie rreth 40 milionë euro. Marrëveshja e garancisë e finalizuar sot, në vlerë 14.9 milionë euro, shërben si dëshmi e mëtejshme e angazhimit tonë për të garantuar kredi për NMVM-të”.
Tutje ka shtuar ai se kjo marrëveshje mundëson kredidhënie në vlerë prej 55 milion euro.
“Kjo marrëveshje parashikohet të lehtësojë qasjen në financa për NMVM-të duke u mundësuar një kredidhënies deri në 55 milionë euro. Mundësitë e ofruara nga Marrëveshja e Ri-garancisë e nënshkruar sot do të hapin rrugën për ofrimin e kushteve më të favorshme për kredi të rigarantuar përmes dritareve të FKGK-së si: ‘Dritare për gratë në biznes’, ‘Dritarja e eksportit’ dhe ‘Dritarja GROW” tha ai.
Nga ana tjetër Guvernatori i BQK-së, Ahmet Ismaili, tha se FKGK-ja mbetet mekanizëm shumë i rëndësishëm për të mirëmbajtur dhe avancuar edhe më tej objektivin për sistem financiar stabil.
“Rritja e vazhdueshme e kapitalit të FKGK-së kombinuar me skema rigarantuese, duke përfshirë edhe marrëveshjen e sotme të rigarancionit ndërmjet FKGK-së dhe Agjencisë Suedeze për Zhvillim ndikon në zgjerimin e qasjes në financa, rritjen e konkurrencës, zvogëlimit të hendekut të financimit me kushte konkurruese, ruajtjen e nivelit të kredive jo-performuese dhe të stabilitetit financiar e që janë edhe në përputhje me strategjinë dhe mandatin e BQK-së”. BQK-ja e konsideron FKGK-në si një mekanizëm shumë të rëndësishëm për të mirëmbajtur dhe avancuar edhe më tej objektivin për sistem financiar stabil, me ndikim në mbështetje të ekonomisë. Prandaj, edhe bashkëpunimi do të fuqizohet në interes të zbatimit të këtyre objektivave”, tha Ismaili.
Të rëndësishme këtë marrëveshje e konsideroi edhe ministrja e Tregtisë, Industrisë dhe Ndërmarrësisë, Rozeta Hajdari.
Ambasadori i Suedisë në Kosovë, Jonas Westerlund, tha se synojnë të krijojnë 2 700 vende të punës me marrëveshjen prej 55 milionë euro.
“Përpjekjet tona të përbashkëta me Fondin synojnë arritjen e 55 milionë euro investime, krijimin e 2 700 vendeve të reja të punës, rritjen e barazisë gjinore në sektorin e biznesit dhe kalimin në një ekonomi më të gjelbër”.
