Koordinatori për Financa në Kabinetin e Qeverisjes së Mirë të PDK-së, Arben Mustafa, ka reaguar ndaj vendimit të Qeverisë për shpërndarjen e subvencioneve për familjet në nevojë për blerjen e druve për kohën e dimrit, përcjell InLajmi.
Ndonëse e përgëzoi Qeverinë që i dha vëmëndje kësaj shtrese të shoqërisë në këtë rast, Mustafa shprehet se në tërësi ato janë të harruara në këtë kohë krize.
Gjithashtu gjatë reagimit të tij, Mustafa shprehet se edhe në këtë rast Qeveria është treguar e ngathët për tiu përgjigjur në kohën e duhur nevojave të qytetarëve. Më tutje ai shton nuk po ofrohet asnjë zgjidhje e qëndrueshme për përmirësimin e jetës së qytetarëve.
Postimi i tij i plotë:
Qeveria e Kosovës paska marrë vendim për t’i shpërndarë disa subvencione te familjet pranuese të ndihmave sociale si mbështetje për blerje të lëndëve ngrohëse.
Mirë që i paska ra ndërmend që ekzistojnë ato familje, sepse i ka braktisur plotësisht në këtë kohë të krizës së rritjes së çmimeve duke mos bërë asnjë rritje të shumës së përfitimit social për ato familje.
Megjithatë, si në çdo rast tjetër, edhe në këtë rast vërehet ngathtësia e kësaj qeverie për t’iu përgjigjur me kohë nevojave të qytetarëve.
Dihet mirëfilli se drunjtë për ngrohje blihen më herët, kur kushtet atmosferike janë më të mira, dhe jo në këtë kohë kur familjet e varfëra ka javë që po sfidohen me temperaturat e ulëta në shtëpitë e tyre dhe kushtet për ti përgatitur drunjtë për ngrohje tani janë shumë më të vështira.
Kjo qeveri si duket është përcaktuar që ta përfundojë mandatin me “harrnime” të tilla të përkohshme dhe të mos ofrojë asnjë zgjidhje të qëndrueshme për përmirësimin e jetës së qytetarëve.
Subvencione dhe subvencione – asgjë tjetër! /InLajmi/
