Pas rezultateve negative të testit të PISA, ka ardhur edhe reagimi i ish ministres së arsimit, Hykmete Bajrami, e cila aktualisht është edhe deputete e LDK-së, përcjell InLajmi.
Në reagimin e saj Bajrami shprehet se këto rezultate ishin të pritshme duke patur parasysh zhvillimet e fundit në fushën e arsimit ku një prej tyre është edhe fillimi i vitit shkollor me vones për 3 vitet e fundit.
Gjithashtu në reagimin e saj, ish ministrja shprehet se ministrja aktuale Nagavci është duke shkelur kushtetutën dhe është duke bërë eksperimente me arsimin duke përmendur këtu se si aktualisht ka ende nxënës të cilët janë duke shkuar në shkolla me libra të pakompletuar.
Bajrami përmbyll reagimin e saj duke thënë se ende nuk është marrë asnjë veprim për riorganizimin e rrjetit të shkollave.
Postimi i saj i plotë:
Rezultatet e PISA-s të pritshme, në 3 vitet e fundit viti shkollor ka nisur me 1 muaj vonesë
- Ministrja e Arsimit punën e parë si ministre e ka bërë duke shkelur Kushtetutën me kthimin prapa të reformës në arsim që e pati nisur Komuna e Kamenicës.
- Veprimi i 2-të i Nagavcit dhe i gjithë Qeverisë ka qenë mposhtja e SBASHK-ut dhe jo ngritja e cilësisë në arsim. Këtë betejë Qeveri-SBASHK e kanë paguar nxënësit, duke humbur mijëra orë mësimore.
- Shkelësja e Kushtetutës, pra ministrja Nagavci, bëri eksperimentin tjetër këtë vit me libra. Dhe, jemi në fund të gjysmëvjetorit të parë dhe ende ka nxënës që shkon me libra të pakompletuar në shkollë.
- Sot, kur po e komentojmë këtë rezultat të PISA-s, MASHT-i me të dhëna të veta konfirmon se në vendin tonë rreth 73% e paraleleve dhe 33 % e shkollave nuk i plotësojnë kriteret ligjore për zhvillim të mësimit dhe ministrja ende s’ka ndërmarrë asnjë veprim për riorganizimin e rrjetit të shkollave. /InLajmi/
