Deputeti i PDK-së, Xhavit Haliti thotë se ka informacione që serbët që jetojnë në Kosovë janë duke u përgatitur që për zgjedhjet në Serbi të votojnë në Rashkë.
Haliti në një prononcim për GazetaBlic thekson se, president serb e ka përgatitur mirë terenin për të fituar vota, kështu sipas tij, duke iu dërguar ushqim e duke ua siguruar transportin.
“Sipas të dhënave të mia, qytetarët e kombësisë serbe që jetojnë në Kosovë kanë dyshtetësi, janë duke u përgatitur për të votuar në Rashkë, atyre Vuçiq ua ka përgatitur transportin dhe dietat me ushqime, me qëllim që sa më shumë të shkojnë për të votuar . Në këtë rast këta do të votojnë kandidatët e Vuçiqit e jo alternativën e partive tjera”, tha Haliti.
Haliti ka folur edhe për Qeverinë e Kosovës e cila e ka ndalur që serbët në Kosovë të votojnë për zgjedhjet e Serbisë, pa pasur marrëveshje ndërshtetërore.
Haliti këtë e quan si thikë me 2 teha, sepse sipas tij, edhe Kurti e dinë shumë mirë që Vuçiqi nuk e bën një gjë të tillë.
“Lejimi dhe moslejimi është thikë me 2 teha, por sipas Kushtetutës së Kosovës ata kanë të drejtë të votojnë në Kosovë e Serbi kur ka zgjedhje për Parlamentin e Kosovës dhe për Presidentin e Parlamentin e Serbisë. Besoj që Kurti e dinë që Vuçiq s’do të bëjë një kërkesë të tillë, për arsyet që dihen”, tha Haliti.
“OSBE po besoj që po përpiqet të zbusë marrëdhënjet në mes të 2 vendeve, dhe një veprim i tillë, të krijojë një situatë të re dhe më pozitive, nga këndëveshtrimi i tyre për raportet e mëtutjeshme. Qendrimet e Kurtit e të Vuçiq janë akrobacione politike për interes të elektoratit.E rrugës do ishte që Kurti e Vuçiq të takoheshin në Beograd e Prishtinë dhe të bënin plane se si do e përshpejtonin rrugëtimin e 2 vendeve drejtë BE së. Qëndrimet e ngurta të të 2 palëve, fjalori luftënxitës i Beogradit e Prishtinës, nuk i shërbejnë asnjërës palë e aq pë pak interesave nacionale të të 2-ja shteteve”, thotë Haliti tutje.
Teksa flet për çështjen e sigurisë në veri të Kosovës, Haliti thotë se Serbia nuk është distancuar asnjëherë nga sulmet dhe sipas tij, kjo siguri arrihet vetëm me marrëveshje të ligjshme politike.
“Sa i përket Veriut, dhe rrezikut për shpërthime të reja, përgjegjësia është e të 2-ja palëve që po vonohemi me zbatimin e marrëveshjeve politike. Në këtë rast Serbia nuk është distancuar dhe nuk e ka deklaruar ndërprerjen a sulmeve të planifikuara kundër territorit të Kosovës, u mbajten zgjedhjet apo su mbajten zgjedhjet brenda terretorit të Kosoves, rreziku është permanent dhe pretendimet e Serbisë për aneksimin e veriut të Kosoves do jenë të vendosura te tavolinat plotë helm antishqiptare të Kishes Serbe, Akademisë së Shkencave të Serbisë, politikave shtetërore të Serbisë. Marrëveshja e ligjëshme politike i zgjedhë të gjitha problemet”, tha Haliti.
