Të hënën në Prishtinë u zhvillua konferenca “Preferencat Gjinore dhe Aborti Selektiv – Diskriminimi gjinor dhe praktika të dëmshme ndaj vajzave” nga Ministria e Drejtësisë në bashkëpunim me Ministrinë e Shëndetësisë, Ministrinë e Arsimit dhe UNFPA, raporton InLajmi.
Gjatë fjalës së saj, ministrja e Drejtësisë, Albulena Haxhiu përmendi vrasjen e Liridona Ademaj teksa i bëri thirrje organeve të drejtësisë që të jepnin dënime maksimale për autorët.
Gjithashtu Haxhiu u shpreh se ndonëse institucionet po veprojnë, duhet akoma edhe më shumë punë që të bëhet.
“Rasti që ndodhi para disa ditësh ishte i rëndë që tronditi opinionin publik. Kjo tregon se përkundër faktit se kemi ndërmarr masa për të luftuar dhunon në bazë gjinore, rasti që ndodhi para disa ditësh tregon se kemi shumë punë për të bërë.Ftoj organet e drejtësisë e sigurisë që të punojnë dhe të ndërmarrja e veprimeve minimale po i shndërron ata në vrasës dhe rasti i fundit duhet të marrë dënimin maksimal nga organet e drejtësisë dhe do të angazhohemi që ta mbërrijmë nivelin e trajtimit të barabartë”, u shpreh Haxhiu.
Ndërkohë, ministrja e Arsimit, Shkencës, Teknologjisë dhe Inovacionit, Arbërie Nagavci u shpreh se janë duke punuar edhe me institucionet arsimore që diskriminime gjinore të mos ndodhin. Ajo u shpreh se aborti selektiv ka efekte emocionale për të gjithë dhe se ky është një fenomen i përkrahur ende nga shoqëria, pavarësisht përmirësimeve të vogla.
“Në këtë aktivitet global, edhe këtë vit e filluam në shkollat tona, duke u munduar që të kemi aktivitete informuese për nxënësit dhe mësimdhënësit. Jo rasishtësisht, patëm aktivitete me nxënës, me arsimtarë e drejtorë. Një prej dukurive negative është edhe aborti selektiv. Ndikon në aspektin emocional, jo vetë të nënave, por të gjithëve. Fatkeqësisht edhe shoqëria jonë vazhdon të jetë në këtë mes përkundër që ka pak përmirësime”. tha ministrja
Më tutje, Arben Vitia, ministri i Shëndetësisë, u shpreh se nuk bëhet fjalë për solidaritet vetëm me gratë, por solidaritet njerëzor. Ai e konsideroi çnjerëzor abortimin për shkak të gjinisë dhe se nuk është gruaja që duhet të fajësohet për këtë.
“Në këtë betejë nuk kërkon solidaritet me gratë, por solidaritet njerëzor. Përveç temës së sotme na ka mbledhur dhuna deri në asgjësim dhe shtypja përkundër punës sonë të përbashkët. Pse konsiderohet disavantazh për të pasur vajzë. Çdo grua në vendin tonë mund të përdor metodat për të kuptuar gjininë e fëmijës. Është çnjerëzore heqja e fëmijës për shkak të gjinisë dhe kjo nuk bëhet me faj të gruas, por e kundërta. Nga të dhënat që i kemi, rezultojnë rreth 1. 070 raste të abortit në Kosovë”, tha Vitia.
Gjatë kësaj konference u tregua se në Kosovë janë rregjistruar rreth 1070 raste të abortit, ku nuk mungojnë abortet selektive. /InLajmi/
