Zgjedhjet parlamentare të Serbisë nuk do të mbahen edhe në zonat me shumicë serbe në Kosovë. Kështu ka deklaruar president i Serbisë Aleksandër Vuçiq, transmeton InLajmi.
“Nuk do të ketë zgjedhje në zonat serbe të Kosovës. Kurti nuk dëshiron t’i lejojë serbët të ushtrojnë të drejtën e tyre natyrore dhe Perëndimi gjithmonë do të thotë se nuk ka mundësi të bëjë presion ndaj Kurtit”, u shpreh Vuçiq, nga Dubai ku po merr pjesë në Samitin COP28 i Liderëve të Ndryshimeve Klimatike.
Vuçiq u shpreh se Serbia duhet ta njoh Kosovën që të lejohen zgjedhjet serbe edhe në zonat me shumicë serbe.
“Duhet ta njohim Kosovën që serbët të marrin pjesë në zgjedhje. Asgjë më shumë dhe asgjë më pak. Dhe të gjithë në Evropë e dinë këtë, është mirë që ata do të reagojnë, por ne nuk do të përfitojmë më shumë nga ky reagim”, tha presidenti serb.
Prandaj, tha Vuçiq neve na mbetet të mendojmë se si t’i mbrojmë interesat tona dhe për sa kohë dhe në çfarë mase mund t’i mbrojmë ato, shkruan Danas.
Kujtojmë se kryeministri Kurti, më 19 nëntor i kishte dërguar një letër shefit të misionit të OSBE-së në Kosovë, Michael Davenport, ku thoshte se Kosova dhe Serbia duhet të arrijnë një marrëveshje ndërshtetërore, në mënyrë që pjesëtarët e komunitetit serb në Kosovë të mund të votojnë në territorin e Kosovës për zgjedhjet parlamentare serbe./InLajmi/
