Deputetja e PDK-së, Blerta Deliu-Kodra, para fillimit të debatit në Kuvend për Raportin e Progresit, ngriti çështjen e sigurisë së qytetarëve, ndërsa u shpreh se ngjarjet e fundit në vend janë të rënda dhe se ato krijojnë pasiguri dhe frikë, raporton InLajmi.
“Para se të fillojë diskutimin tim për raportin e Komisionit Europian për Kosovën, natyrisht që është e pashmangshme që të flas për ngjarjet e fundit në vend, të cilat na kanë tronditur të gjithëve. Vrasjet, vetëvrasjet, grabitjet e armatosura, qarkullimi i madh i armëve në Kosovë, dhuna dhe pasiguria e frikshme që është krijuar këtu, është vërtetë e rëndë”, tha Deliu-Kodra.
Ajo kujtoi ngjarjen e së mërkurës ku një grua u vra gjatë grabitjes së armatosur, sikur edhe rasti tjetër i vdekjes së një burri po të mërkurën pas therrjes me thikë.
“Jo më larg se mbrëmë të gjithin ishin dëshmitarë të një tjetër vrasjeje të një gruaje. 33-vjeçarja Liridona Murseli mbeti e vrarë pasi që ajo bashkë me familjen ishin cak i një grabitjeje të armatosur. Vetëm pak orë pas këtij rasti tragjik, një burrë ka humbur jetën pas plagëve të marra nga therrja me thikë po në kryeqytetin e Kosovës në Prishtinë”, u shpreh deputetja, e cila shprehu ngushëllime familjarëve, ndërsa kërkoi që “institucionet e drejtësisë dhe institucionet përgjegjëse që të marrin menjëherë masa”./InLajmi/