Ditën e mërkurë, kolonel Gazmend Hoxha, drejtor i përgjithshëm i Policisë së Kosovës zhvilloi një takim me komandantin e KFOR-it, gjeneral Ozkan Ulutas, në të cilin diskutuan rreth temave të cilat kishin lidhje me situatën e sigurisë në Republikën e Kosovës, përcjell InLajmi.
Policia e Kosovës gjithashtu njoftoi se gjatë takimit u rikonfirmua vazhdimi i bashkëpunimit të mëtejshëm ndërmjet këtyre dy institucioneve për të garantuar një mjedis sa më të sigurt për qytetarët. Gjithashtu një pikë tjetër e diskutimeve gjatë këtij takimi ishin edhe aktivitetet dhe patrullimet e përbashkëta ndërmjet PK-së dhe KFOR-it.
Postimi i plotë:
Drejtori i përgjithshëm i PK-së, kolonel Gazmend HOXHA, priti në takim komandantin e KFOR-it, gjeneral Ozkan ULUTAS
Me datën 29 nëntor 2023, drejtori i Përgjithshëm i Policisë së Kosovës, kolonel Gazmend HOXHA me bashkëpunëtorë, priti në takim njohës komandantin e KFOR-it, gjeneralin Ozkan ULUTAS, i cili po ashtu ishte i shoqëruar nga bashkëpunëtorë të tij. Përveçse ishte një takim njoftues u diskutuan edhe tema të ndryshme të cilat ishin në interes të situatës së sigurisë në Republikën e Kosovës.
Takimi rezultoi me rikonfirmimin e vazhdimit të bashkëpunimit të mëtejmë dhe avancimit të shkëmbimit të informacioneve në funksion të ruajtjes së një ambienti më të qetë dhe të sigurt për të gjithë qytetarët pa dallim. Pikë tjetër e diskutimeve ishin aktivitetet dhe patrullimet e përbashkëta në mes të PK-së dhe KFOR-it, të cilat reflektojnë në situatën e sigurisë në tërë vendin, përfshirë veriun.
Të dy palët u dakorduan se vazhdimi i bashkëpunimit, mirëbesimit dhe realizimit të aktiviteteve të përbashkëta, ndikon në rritjen e mëtejme të nivelit të sigurisë së përgjithshme. / InLajmi /
