Kryetari i Aleancës për Ardhmërinë e Kosovës, Ramush Haradinaj, rikujtoi kohën kur ai ishte në procesin gjyqësor në Hagë, përcjell InLajmi.
Haradinaj shprehet se pas marrjes së aktakuzës nga Haga, filloi një proces i gjatë gjyqësor, por u shpreh se pati përkrahje nga të gjitha anët, jo vetëm nga familja, por edhe nga qytetarët dhe institucionet e Kosovës.
Kryetari i AAK thotë se është i bindur që edhe ata që janë aktualisht duke u gjykuar në Hagë, do të kenë fatin e tij, për të dalë të pafajshëm nga kjo gjykatë.
Postimi i tij i plotë:
Të dashur qytetarë,
Më 17 nëntor 2004 pata dhënë dorëheqje nga posti i kryeministrit, për t’u paraqitur për intervistim para prokurorëve të Hagës në Prishtinë, si i dyshuar për krime lufte dhe thyerjen e ligjeve dhe rregullave të luftës.
Pas marrjes së aktakuzës së parë, filloi një proces i gjatë gjyqësor. Që nga ajo ditë e deri më 29 nëntor 2012, zgjati ndjekja ligjore ndaj meje. Edhe pse në aktgjykimin e parë u lirova si i pafajshëm, pas disa vjetësh jam rikthyer për herë të 2-të në rigjykim.
I gjithë ky proces gjyqësor zgjati më shumë se 8 vjet, ku përfundimisht sot para 11 vjetësh, mora aktvendimin e pafajësisë i cili vulosi pafajësinë time dhe të bashkëluftëtarëve të mi, për luftën e drejtë dhe të pastër të UÇK-së.
Në këtë proces për vendosjen e drejtësisë, asnjëherë nuk mbeta i vetëm. Kisha afër familjen, bashkëluftëtarët, gjithë qytetarët e diasporën, por edhe institucionet tona, edhe pse në pjesën e parë nuk ishim shtet i pavarur.
Edhe atë kohë kishim ndjenjën që drejtësia e vonuar është drejtësi e mohuar, por megjithatë kur erdhi ishte lehtësim i madh, çlirim nga padrejtësitë që ndodhën gjatë procesit.
Po ashtu sot besoj që do të vërtetohet pafajësia dhe pastërtia e bashkëluftëtarëve që janë duke u përballë me sfidën e radhës në Hagë. Ata shkuan si çlirimtarë atje, ashtu do të kthehen! /InLajmi/
