Në kuadër të fushatës “16 Ditë aktivizëm kundër dhunës me bazë gjinore”, ministrja e Arsimit, Shkencës, Teknologjisë dhe Inovacionit, Arbërie Nagavci, së bashku me ministren e Drejtësisë, Albulena Haxhiu, mbajtën një ligjëratë në të cilën diskutuan rreth raportimit dhe ndëshkimit të dhunës me bazë gjinore, raporton InLajmi.
Ministrja Nagavci gjatë kësaj ligjërate tha se kjo fushatë do të shoqërohet me aktivitete nëpër shkolla të ndryshme të cilat do të kenë për qëllim vetëdijësimin e nxënësve kundër dhunës.
“Të vetëdijshëm për punën e mirë që bëhet në këtë shkollë do të shënojmë bashkërisht fushatën që adresojnë parandalimin dhe vetëdijesimin kundër dhunës në të gjitha format. Sot në të gjitha shkollat e Kosovës fillon dita me aktivitete të ndryshme të shprehura, të cilat kanë të bëjnë me vetëdijesimin edhe të nxënësve kundër dhunës”, u shpreh ajo.
Ndërkohë, ministrja Haxhiu shprehi shqetësimin e saj për rastet e shpeshta në Kosovë të dhunës në baza gjinore. Ajo u bëri thirrje nxënësve se problemet nuk duhen zgjidhur me dhunë, por në vend të saj duhet qetësi dhe bashkëpunim. Gjithashtu, Haxhiu u shpreh se rastet e dhunës duhet të raportohen.
“Asnjëherë nuk duet të zgjidhen problemet përmes dhunës. Jam e bindur se gjatë kohës që jeni në shkollë do të keni mospajtime por që do ta kaloni me qetësi dhe të bashkëpunoni me njëri-tjetrin. Dhuna duhet të raportohet, përgjegjëse është policia dhe po ashtu dhuna në familje është e shprehur shumë edhe te fëmijët”, tha ministrja Haxhiu.
Gjithashtu gjatë këtij aktiviteti, ministret iu përgjigjën edhe pyetjeve të nxënësve.
