Të shtunën në Prishtinë, u mbajt ceremonia e inaugurimit të shtatores së heroit Hasan Prishtina nga fondacioni i cili mban të njëjtin emër, raporton InLajmi.
Mehmet Prishtina, nga ky fondacion u shpreh se gjatë vitit 2023 janë bërë aktivitete të shumta për të kujtuar dhe nderuar figurën e Hasan Prishtinës. Gjithashtu ai u bëri thirrje edhe politikanëve që të merrnin shembull nga kjo figurë historike.
“Fondacioni Hasan Prishtina ka organizuar vitin 2023 si vit të Hasan Prishtinës, duke bërë aktivitete në trevat ku Hasan Prishtina ka vepruar, që nga Dibra, sot në Prishtinë duke vazhduar në Kukës . Ky fondacion ka bërë edhe libra për Hasan Prishtinën duke iu dhuruar fëmijëve me qëllim të promovimit të veprës s[ Hasan Prishtinës. Sot më shumë kemi nevojë që liderët të marrin si shembull heroin Hasan Prishtinës dhe të veprojnë . Liderët që nuk nderojnë Hasan Prishtinën janë qyqar”, tha ai.
I pranishëm në këtë ceremoni ishte edhe pasardhësi i Gjergj Kastriotit, Loris Kastrioti- Skënderbeu II i cili u shpreh se këto janë ceremoni të rëndësishme të cilat na lejojnë që të kujtojmë historinë se nga vijmë.
“Këto ceremoni janë të rëndësishme sepse na tregojnë nga vijmë ne dhe na bëjnë të mos harrojmë historinë, sepse kush nuk njeh historinë nuk njeh vetën dhe ky është një moment unik për të ardhmen tonë historike”, tha ai.
Viti 2023 shënoi 150 vjetorin e lindjes dhe 90 vjetorin e heroit Hasan Prishtina prandaj edhe është cilësuar si viti i tij. /InLajmi/
