Ish- deputeti i VV-së Fatmir Humolli, në një prononcim për Gazeta Blic, ka reaguar pas deklaratës së kryeministrit Kurti, ku tha se draftin e Asociacionit mund ta bëjnë publik ndërkombëtarët, pasi që me ta është pajtuar që mos të bëhet publik.
Sipas Humollit, sjellja e Kurtit nuk lë shumë hapsirë për komente, pasi që ai po vazhdon të tregoj mospërfilljen e tij ndaj popullit dhe nënvlerësimin që i bën sistemit demokratik duke mos e respektuar votën e qytetarëve.
“Sjellja e tij (e përsëritur tashmë) nuk lë hapësirë për shumë komente. Ai po vazhdon të tregoj mospërfilljen e tij ndaj popullit dhe nënvlerësimin që i bën vet sistemit demokratik duke mos e respektuar votën e qytetarëve, duke i ofenduar ata përmes fyerjes që po i bën Kuvendit si institucioni me i lartë përfaqësues i qytetarëve”, shtoi Humolli.
Tutje ai thotë se ofendimi i qytetarëve, i Kuvendit dhe i pozicionit të kryeministrit ka bërë që presioni ndërkombëtar të jetë kundër Kosovës dhe jo kundër Serbisë.
“Ofendimi i qytetarëve, ofendimi i Kuvendit dhe ofendimi i vet pozicionit të Kryeministrit ka bërë që presioni ndërkombëtar të drejtohet kundër Kosovës dhe jo kundër Serbisë”, tha Humolli për Gazeta Blic.
Ndryshe nga Humolli, për Gazeta Blic, ka reaguar edhe nënkryetari i LDK-së, Lutfi Haziri, pasi që Kurti tha se draftin mund ta publikojnë vetëm ndërkombëtarët. Haziri tha se Burim Ramadani, i cili e publikoi draft statutin e Asociacionit është shtetas i Kosovës.
“Burim Ramadani është shtetas i Kosovës KM”, ka thënë Lutfi Haziri për Gazeta Blic.
Kujtojmë që ish-inspektori i AKI-së, Burim Ramadani ka publikuar një version të draft-statutit për Asociacionin që siç thotë ai është i njëjti që i është dhënë kryeministrit të Kosovës, Albin Kurti.
