Pasi Gjykata Kushtetuese Kosovës përmes aktvendimit për Ligjin për Masat e Përkohshme të Produkteve Themelore në Raste të Veçanta të Destabilizimit në Treg, i dha të drejtë LDK-së, kryetari Lumir Abdixhiku tha se ashtu siç është pritur gjykata hodhi poshtë edhe një ligj të Qeverisë më antikushtetuese që kemi pasur ndonjëherë, përcjell InLajmi.
Abdixhiku theksoi tutje se duke e cilësuar “ligjin për çmimet tavan” si ligj në kundërshtim me vlerat bazike të lirisë ekonomike të Republikës, kjo gjykatë shpërfaqi jo vetëm paaftësinë e kësaj qeverie por dhe tendencat që me vetëdije të shkelin Kushtetutën
Lideri i LDK-së shkon edhe më larg, ndërsa shprehet se “Çfarë mend kanë, do të ankohen, sikurse deri më tani se si një ligj antikushtetues nuk zë vend”
Postimi plotë i tij:
Siç edhe pritej, siç edhe kishim thënë gjithherë, Gjykata Kushtetuese e Kosovës hodhi poshtë EDHE NJË LIGJ, në gjithë tërësinë e tij, të qeverisë më antikushtetuese që ka pasur Kosova ndonjëherë.
Duke e cilësuar ‘ligjin për çmimet tavan’ si ligj në kundërshtim me vlerat bazike të lirisë ekonomike të Republikës, kjo gjykatë shpërfaqi jo vetëm paaftësinë e kësaj qeverie por dhe tendencat e tyre që me vetëdije të shkelin Kushtetutën.
Kryeministri e ministrat rend mburreshin me këtë ligj.
Kryeministri e ministrat mburreshin me paditurinë.
Ju thoshim se s’bën, nuk kuptuan. Ju treguam si të bëhet, nuk dëgjuan. Ju thoshim se do të rrëzohet, u rrëzua. Tani nuk di cila është më e rëndë; paaftësia apo shkelja kushtetuese? Apo lënia e qytetarëve pa politikë adekuate e kushtetuese tash e dymbëdhjetë muaj.
Çfarë mend kanë, do të ankohen – sikurse deri më tani – se si një ligj antikushtetues nuk zë vend. Merreni me mend, një kryeministër që ankohet se nuk po e lënë ta shkelë Kushtetutën. Sepse për ta, Republika është në shërbim të tyre.
Për ne, Lidhjen Demokratike, Republika mbetet mbi të gjitha.
