Zjarri në IML, Gashi: Mund të jetë shkaktuar për të zhdukur gjurmë e prova kriminale

Shefi iGrupit Parlamentar të Lidhjes Demokratike të Kosovës, Arben Gashi, gjatë fjalës së tij në seancën e Kuvendit , kujtoi disa nga skandalet e ndodhura këtë javë, ndërsa shprehu shqetësimin se zjarri në Institutin e Mjekësisë ligjore mund të jetë i qëllimshëm, raporton InLajmi.

Ndërsa hodhi dyshime, deputeti Gashi tha se ky zjarr mund të jetë shkaktuar për të zhdukur gjurmë dhe prova kriminale.

“Sot i drejtohem këtij Kuvendi dhe qytetarëve të Kosovës për të vënë theksin në 3 skandale qeverisëses gjatë një jave. Skandali i parë është shtyrja e regjistrimit të popullsisë dhe pronës për një kohë të caktuar që më në detaje do të flas pas meje deputeti Avdullah Hoti”, tha Gashi, ndërsa ndaloi më shumë tek skandali i radhës, ai i zjarrit në IML.
“Skandali i 2-të është djegia për herë të 2-të e IML-së, që për në vetvete jo vetëm që është skandal por është një rast jashtëzakonisht i rëndë që s’mund të tolerohet. Nuk mund të tolerohet sepse bëhet fjalë për një Institut që ka për detyrë dhe funksion të merret me hulumtimin shkencor të rasteve të vdekjeve, vrasjeve, vdekjeve të dyshimta e të tjerë”, deklaroi deputeti Gashi.

Ai përmendi edhe deklaratën e ministres së Drejtësisë, Albulena Haxhiu. Gashi foli edhe për raportimet se në këtë zjarr janë djegur mustaqet e Adem Jasharit dhe gishti i Isa Boletinit.

“E më e rëndë bëhet akoma kur kjo ndodhë për herë të dytë. Nëse e marrim dhe i shohim qëndrimet e ministres së drejtësisë e shohim që kjo situatë merr përmasa kriminale. Pra ministrja e Drejtësisë deklaron publikisht se nuk ka dëmtim të arkivës, nuk ka dëmtim të mostrave mortore që mbahen në këtë Institut, e ndërkohë në media thuhet dhe rezulton se ka dëmtim të arkivës, jo vetëm që ka dëmtim të mostrave, por ka dëmtim të mbetje mortore të komandantit Adem Jashari e Isa Boletini, e mos të flasim për raste të qytetarëve të tjerë, të cilat mund të kenë dhe përmbajtje të qëllimshme për zhdukjen e rasteve kriminale”, tha Gashi.