Ministrja e Drejtësisë Albulena Haxhiu, pati një përplasje me deputetin e PDK-së Abelard Tahiri e cila këtij të fundit i tha se “do t’i vinte turp po të ishte në vendin e tij”, raporton InLajmi.
“Me qenë sikur ti me kish ardh turp për ty. Cili ka qenë veprimi yti për krijimin e kushteve në këtë Institut sepse nuk e ke pasur rastin me rregulluar ndonjë gjë. Keq ma ke lënë IML e keq ma ke lënë SHKK-në. Më mirë hesht por nëse nuk hesht mos tento me hedh hi në këtë Kuvend”, tha Haxhiu.
Ndërsa për raportimet në media për djegien e mustaqeve të Adem Jasharit e gishtit të Isa Boletinit, Haxhiu tha se ato kanë qenë dhuratë nga familja për njërin prej punonjësve aty.
E ndaj këtij fjalimi reagoi deputeti i PDK-së, Abelard Tahiri, se do ti kishte “ardhur marre” po të zhdukeshin mustaqet e Adem Jasharit.
“Me pas qenë ministër i Drejtësisë dhe me pas humb mostrat e Astrit Deharit nuk kisha mundur me qenë në skenën politike. Besoni se nuk kisha mundur me qenë në skenë politike. Së paku në mandatin tim nuk ka pasur gjëra të tilla. Me ardh me dhënë një arsyetim kaq të tillë e me fol për mustaqet e heroit Adem Jashari me kaq lehtësi, më kish ardh marre”, u shpreh Tahiri.
Seanca po vazhdon me debate të ashpra me theks nga opozita e cila kritikon qeverisjen aktuale për skandalet e shumta që po ndodhin dhe mos punën./InLajmi/
