Deputeti i Lëvizjes Vetëvendosje, Arbër Rexhaj, ka ngritur shqetësimet për aktivitetet e Serbisë kundrejt sigurisë në veri, ndërsa theksoi se shteti serb vazhdon ta cenojë sigurinë e Republikës së Kosovës, raporton InLajmi.
Ai kujtoi kështu sulmin e 24 shtatorit në Banjskë, për të shtuar se edhe pas 8 javësh, kryeterroristi Milan Radojiçiq vazhdon të jetë nën mbrojtje nga Serbia.
Deputeti Rexhaj, përsëriti kërkesën e institucioneve që Radojiçiqi të ekstradohet në Kosovë.
“Që pas sulmit në Banjskë, aktiviteti i terroristit serb nuk kanë pushuar së riorganizuari kundrejt republikës së Kosovës. Pesë muaj pas arrestimit të policëve dhe tetë javë pas vrasjes së rreshterit Afrim Bunjakut, terroristët vazhdojnë të jenë në mbrojtje nga shteti serb”, u shpreh Rexhaj.
Duke kujtuar se shteti serb vazhdon dislokimin e forcave ushtarake përgjatë kufirit me Kosovën, Rexhaj tha se kjo është kërcënim për sigurinë e vendit tonë.
“Serbia asnjëherë nuk ka pushuar së kërcënuari sigurinë në Kosovë edhe pas presionit nga ndërkombëtarët, shteti serb ende nuk i ka larguar forcat përskaj kufirit me Kosovën por i ka shtuar edhe më shumë ato”, tha Rexhaj.
Ai beson se autorët e veprave terroriste si dhe vrasjes së rreshteit të policisë në sulmin në Banjskë duhet të dalin para drejtësisë./InLajmi/
