Presidenti i Këshillit Evropian, Charles Michel, tha dje se zgjerimi i BE-së do ta bëjë bllokun më të sigurt dhe më të avancuar, por gjithashtu do të sigurojë stabilitet dhe paqe për vendet e Ballkanit.
Pas mbërritjes në Zagreb për një takim me kryeministrat e Kroacisë, Maltës, Polonisë dhe Italisë, Michel theksoi se është e nevojshme që anëtarët e BE-së të arrijnë unitetin për çështjet strategjike.
“Zgjerimi është një investim për paqen dhe përparimin në të ardhmen. Duhet të flasim se si të përgatitemi për momentin kur do të ketë më shumë se 30 anëtarë në Bashkimin Evropian”, shtoi Michel, raporton HRT,.
Kryeministri kroat Andrej Plenkoviq theksoi se Kroacia mbështet procesin e zgjerimit të Bashkimit Evropian.
“Kroacia është një nga ato shtete anëtare që inkurajon procesin e zgjerimit, veçanërisht për vendet fqinje të Evropës Juglindore, por ne jemi gjithashtu në favor të procesit të zgjerimit për Ukrainën dhe Moldavinë, si dhe perspektivën e Gjeorgjisë, e cila mori një sinjal pozitiv në raportin e fundit të Komisionit Evropian”, tha Plenkoviq,
Në konferencën për shtyp, Plenkoviq dhe Michel komentuan deklaratën e presidentit ukrainas Volodymyr Zelensky, i cili paralajmëroi se Rusia po planifikon të provokojë një luftë të re mes dy vendeve në Ballkan dhe se kjo do të jetë një shpërqendrim i ri rus në botë.
“Jam i bindur se rruga evropiane për vendet e Ballkanit Perëndimor është hapi më i rëndësishëm për paqen këtu”, tha Michel i pyetur nga një gazetar për deklaratën e Zelenskit.
Plenkoviq tha se mesazhi i Zelenskit është i qartë në kontekstin e destabilizimit më të gjerë të të gjithë kontinentit evropian.
“Ne kemi disa vatra potenciale të destabilitetit. Politika e Kroacisë është të bëjë përpjekje maksimale në mënyrë që komuniteti ndërkombëtar të angazhohet fuqishëm në zonën e Evropës Juglindore, prandaj ne po mbrojmë zgjerimin e BE-së me fqinjët tanë”, tha kryeministri kroat.
Duke rënë dakord me rëndësinë gjeopolitike të zgjerimit, kryeministrja italiane Meloni vuri në dukje nevojën që BE të fokusohet në temat kryesore strategjike.
“Evropa duhet të bëhet një gjigant politik dhe jo-burokratik dhe të luajë një rol udhëheqës në nivel global falë identitetit dhe vlerave të saj,”.
Sipas saj, ndër çështjet për të cilat duhet të punohet bashkërisht në vitet në vijim, krahas ndërtimit të një autonomie reale të hapur strategjike, ajo vuri në dukje menaxhimin e përbashkët të fenomeneve të migracionit përmes ndërtimit të partneriteteve të barabarta me vendet e 3-ta, transmeton FrontOnline
Michel zgjodhi Zagrebin si një nga 4 qytetet kryesore, së bashku me Parisin, Berlinin dhe Kopenhagenin, ku po mbahet mini-samiti për programin strategjik të Bashkimit Evropian.
