Ministri i Mbrojtjes, Ejup Maqedonci, bashkë me komandantin e FSK-së, gjenerallejtënant Bashkim Jashari, kanë pritur sot në takim shefin e Shtabit të Forcave të Armatosura të Republikës së Shqipërisë FARSH, gjeneral major, Arben Kingji, me delegacionin e lartë të FARSH-it për të cilin u diskutua rreth situatës aktuale të sigurisë.
Krerët eushtarak kanë biseduar edhe rreth mundësisë së thellimit të bashkëpunimit bilateral ndërmjet forcave të të 2 vendeve në disa fusha ushtarake.
Ministri Maqedonci shprehu mirënjohje të thellë për Forcat e Armatosura të Republikës së Shqipërisë, për kontributin e veçantë të tyre në zhvillimin dhe avancimin e aftësive dhe kapaciteteve operacionale të FSK-së, veçanërisht në fushën e arsimimit dhe stërvitjes.
“Gjithashtu, ai ritheksoi rëndësinë e jashtëzakonshme që ka mbështetja nga ana e Ministrisë së Mbrojtjes së Republikës së Shqipërisë dhe FARSH, si shtet anëtar i NATO-s, duke pasur parasysh përvojën e madhe në procesin e integrimeve euroatlantike, si dhe në ngritjen dhe zhvillimin e operacionalitetit ushtarak në përgjithësi”, thuhet në njoftimin zyrtar.
Siç bëhet e ditur në njoftim, gjeneral Jashari shprehu mirënjohje për përpjekjet e pashtershme të Shqipërisë për mbështetjen e dhënë për zhvillim dhe avancim të mëtejmë të FSK-së dhe në përafrimin e ushtrive të të 2-ja vendeve.
Ndërsa, Gjeneral Kingji në këtë takim ofroi mbështetjen e pakushtëzuar të Shqipërisë për anëtarësimin e Kosovës në iniciativat rajonale.
Gjithnjë sipas njoftimit bëhet e ditur se bashkëbiseduesit u dakorduan që të vazhdohet ky bashkëpunim i ngushtë për të garantuar mbrojtjen e interesave kombëtare.
