Ish-kryetarja e Preshevës, njëherësh këshilltarja e kryeministrit Albin Kurti, Ardita Sinani, ka reaguar pas publikimit të Raportit të Progresit, ndërsa thekson se raporti përforcon edhe më shumë konkluzionet e institucioneve paraprake ndërkombëtare se Serbia ka regres në shumë fusha, përcjell InLajmi.
Sipas saj, Serbia regres po shënon në shumë drejtime, ndërsa regresi i saj shihet edhe në shkeljen e të drejtave të pakicave në veçanti të shqiptarëve.
Sinani, shprehet gjithashtu se shqiptarët në Serbi e veçanërisht në Luginë të Preshevës në mënyrë konsistente po përballen me diskriminim të vazhdueshëm shtetëror në të gjitha sferat e jetë.
Tutje Sinani përmend disa nga pikat e Raportit të BE-së për Serbinë, sikur kjo e fundit sipas raportit del se ka ngulfatur lirinë e shprehjes për shqiptarët, pasivizimi i adresave të shqiptarëve që jetojnë në Serbi etj.
Postimi i plotë i saj:
Raporti i Bashkimit Evropian për Serbinë për vitin 2023 përforcon edhe më shumë konkluzionet e të gjitha raporteve paraprake të institucioneve ndërkombëtare. Ser Serbia vazhdon të shënoj regres në shumë fusha e mes tjerash me theks të veçant shkeljes së të drejtave të pakicave në përgjithësi, e pakicës shqiptare në veçanti.
Serbia sipas raportit të fundit të BE për vitin 2023 është shumë mbrapa edhe sa i përket realizimit të të drejtave elementare të njeriut.
Bashkimi Evropian dhe të gjitha qendrat e vendosjes ndërkombëtare tash e sa vite në raportet e tyre këshillojnë përmirësimin e saj në shumë fusha, e ky raport evidenton atë që ky shtet nuk ka shënuar asnjë hap përpara.
Shqiptarët në Serbi e veçanërisht në Luginë të Preshevës në mënyrë konsistente po përballen me diskriminim të vazhdueshëm shtetëror në të gjitha sferat e jetës.
Raporti i BE për Serbinë evidenton nevojën e domosdoshme për trajtimin konform konventave evropiane të pakicave kombëtare, nevojën për sigurimin e teksteve në gjuhën shqipe e shumë fusha tjera.
Sipas këtij raporti, Serbia ngulfat lirinë e shprehjes për pakicën shqiptare si dhe mungesën e integrimit të shqiptarëve në institucionet publike e shtetërore.
Pasivizimi i adresave të shqiptarëve që jetojnë në Serbi është një brengë e Bashkimit Evropian që nënvizohet në këtë raport.
Gjuha e urrejtjes së zyrtarëve të lartë shtetëror serb dhe retorika diskriminuese është poashtu një element që raporti i BE i jep theks shqetësues./InLajmi/
