Analisti politik, Dardan Gashi ka deklaruar se Asociacioni është temë e kryer pasi sipas tij, tashmë të gjitha partitë, duke përfshirë edhe opozitën aktuale dhe atë të dikurshmen, e kanë pranuar atë.
Po ashtu, sipas Gashit, aktualisht fokusi në Kuvendin e Kosovës është një shtyrje e përgjegjësive, duke u përpjekur të zbulohet se cila parti ka manipuluar më shumë dhe cila ka keqpërdorur çështjen e Asociacionit.
“Asociacioni është punë e kryer sepse është pranuar edhe prej kësaj Qeverie, opozita aktuale e ka pranuar më herët, opozita e dikurshme e ka pranuar tash në pushtet, për këtë arsye është kjo situatë në Kuvend. Tash vetëm shtyhen se cili ka gënjyer më shumë edhe cili e ka keqpërdorur më shumë këtë temë”,ka deklaruar Gashi.
Gashi ka thënë se kjo situatë ka shtyrë edhe ambasadorin amerikan, Jeff Hovenier të shprehë shqetësimin e tij, duke thënë se debati aktual mund të sjellë pasojë për kryeministrin Albin Kurtin, duke e bërë të mundur tërheqjen e tij nga pranimi i Asociacionit.
Gashi vlerëson se Kurti ka frikë nga humbja e përkrahjes së popullit, duke e lidhur atë me përkushtimin e tij për çështje të tjera.
“Këtu besoj që me ndryshe nuk ka shumë. Edhe për atë arsyeja besoj ka dal edhe ambasadori me fol sot, sepse frikësohet se nga ky debat i cili është më shuëm jashtë parlamentit sesa brenda, mund të rezultojë që Albin Kurti të frikësohet dhe të fillojë të tërhiqet prap. Sepse Albin Kurti një frik e ka, që mund të humbas përkrahjen e popullit se nuk mërzitet për punë të tjera”, ka deklaruar Gashi, në Debat Plus.
Gjithashtu, analisti Gashi ka shtuar se njohja de-facto mund të çojë në një situatë ku Serbia do ta njohë Kosovën vetëm si një instrument.
