Qeveria e Kosovës, në mbledhjen e së mërkurës emëroi Atdhe Hetemin drejtor ekzekutiv të Institutit për Krimet e Kryera gjatë luftës në Kosovë, ndërsa ky emërim është një hap drejt angazhimeve për adresimin e të gjitha krimeve, raporton InLajmi.
Kurti shtoi se po angazhohen për adresimin e të gjitha krimeve dhe për t’i matur dëmet e shkaktuara, ndërsa theksoi se Serbia duhet të përgjigjet për krimet e kryera në luftën në Kosovë.
“Për të ndërtuar të ardhmen duhet adresuar të shkuarën. Ballafaqimi me të kaluarën është proces shërues dhe mekanizëm i domosodshëm për përparim shoqëror. Duke qenë e drejtë individuale e të mbijetuarve, viktimave dhe familjeve, por edhe kolektive është edhe obligim për shtetin. Shteti duhet të mundësojë që këto të drejta të realizohen. Qeveria është e përkushtuar për të vërtetën, të drejtën për të ditur dhe drejtësinë si parakushte për paqen e qëndrueshme”, tha Kryeministri Kurti.
Tutje para kabinetit qeveritar, Kurti u shpreh se krimet kundër njerëzimit nuk mund të harrohen.
“Krimet e luftës, krimet kundër njerëzimit dhe gjenocidi nuk janë të shkuara. Plagët janë ende të njoma. Ato janë të hapura për mijëra familjarë. I japim prioritet ndriçimit të fatit të të zhdukurve. Gjatë këtij vitit janë kryer gërmime në 11 lokacione prej tyre 5 lokacione kanë rezultuar në gjetjet dhe zhvarrosjen e të paktën 6 viktimave të luftës, pa përfshirë rastet e fundit në Bishtazin, Gjakovë dhe Prizren”, deklaroi kryeministri Kurti/InLajmi/.
