Zyra për Qeverisje të Mirë , të hënën publikoi Manualin për zbatimin e Politikës Kundër Ngacmimit Seksual në Organet e Administratës Publike, manual i cili ofron njohuri praktike për politikën kundër ngacmimit seksual procedurat e raportimit dhe procedurat për trajtimin e rasteve të ngacmimit seksual në vendin e punës, raporton InLajmi.
Drejtor i Zyrës për Qeverisje të Mirë, në kuadër të Zyrës së Kryeministrit, Habit Hajredini ndërsa iu drejtua të pranishmëve tha se duhet të punohet nga të gjithë në mënyrë që të adresohen ngacmimet në vendin e punës.
Hajredini , gjithashtu bëri të ditur se Qeveria ka miratuar Politikën kundër Ngacmimit Seksual në Organet e Administratës Publike, e që sipas tij kjo politikë do do të shërbejë si një udhërrëfyes për parandalimin e të gjitha formave të ngacmimit seksual në vendin e punës, për të siguruar një mjedis pune pa diskriminim dhe ngacmim seksual në të gjitha organet e administratës publike.
“Do të thotë për të pasur një ambient të mirëfilltë në mjedisin e punës pa diskimin, pa paragjykim, pa ngacmime seksuale duhet angazhim. Unë e di që për vite kjo ka qenë tabu me kuptimin e plotë të fjalës. Ka ardhur kohe që të adresojmë çështje në parandalimin e kësaj dukurie. Qeveria ka marrë përsipër t’i adresoj çështjet për parandalimin e ngacmimeve seksuale”, u shpreh Hajredini, ndërsa theksoi se për luftimin e ngacmimit seksual nevojitet shtimi i kapaciteteve.
“Ka qenë kërkesa jonë së bashku me OSCE të bashkëbisedojmë me këtë se çfarë mund të punohet. Patjetër është obligim ngritja e kapaciteteve, duhet të krijohen struktura për luftimin e ngacmimit seksual për administratën publike. Nuk guxojmë të heshtim të mos flasim. Pa dyshim nuk kemi lënë anash edhe sektorin privat”, tha Hajredini.
Nga ana e tij Mark Lasser, shef i Seksionit për Ligj dhe Drejtësi në OSBE, tha se e kanë mbështetur Kosovën për hartimin e politikave në këtë drejtim.
Sipas tij, rastet e ngacmimeve në vendin e punës janë prezent, po që mungojnë raportimet.
“Ngacmimi seksual është forma e diskriminimit që ndikon në mjedisin e punë, krijon praktika të padrejta dhe ndikon negativisht. Edhe pse nuk duket që ka ndonjë statistikë zyrtare për ngacmimet në vend të punës, niveli i pretendimeve për ngacmim seksuale është shumë i ultë, megjithatë edhe pse mund të ketë shumë pak raportime kundër ngacmimit seksual nuk do të thotë që nuk ndodh ngacmimi. Ngacmimi seksuale është vepër penal sipas legjislacionit të Kosovës. Në sektorin privat ngacmimi në vend të punës është i pranishëm, por mungon raportimi”, tha Lasser.
Gzim Shala, nga IKD-ja, tha se Manuali përmbledhë numër të praktikave shumë të rëndësime për trajtimin e këtyre rasteve.
Luljeta Demolli, drejtoreshë e Qendrës Kosovare për Studime Gjinore, tha se institucionet duhet të bëjnë publike numrin e ngacmimeve në vendin e punës, duke shtuar se mosraportimi është problem teje shqetësuese.
