Kryetari i Forumit Kombëtar Serb, Momçilo Trajkoviq, ka thënë se politika 10 vjeçare e Aleksandër Vuçiqit ndaj Kosovës, do të kurorëzohet me një tradhti të lartë ndaj interesave kombëtare, transmeton InLajmi.
Në një intervistë për agjencinë Beta, Trajkoviq tha se me njohjen e paralajmëruar të dokumenteve të Kosovës, Beogradi do ta njohë edhe de fakto edhe de jure pavarësinë e Kosovës.
“Aleksandar Vuçiq, në mënyrë jokushtetuese dhe pa u konsultuar me asnjë institucion shtetëror apo kombëtar, në 10 vitet e fundit ia dorëzoi Prishtinës të gjitha elementet e shtetësisë serbe në Kosovë. Tani, kur ai do të njohë të ashtuquajturat dokumente të Republikës së Kosovës, ai do ta njohë edhe de fakto edhe de jure pavarësinë e Kosovës dhe ky do të jetë akti përfundimtar i tradhtisë së lartë të interesave kombëtare serbe”,tha Trajkoviq.
Duke komentuar faktin se presidenti Vuçiq thekson se ai kurrë nuk do ta nënshkruajë pavarësinë dhe do ta mbështesë anëtarësimin e Kosovës në Kombet e Bashkuara (OKB), Trajkoviq tha se Kina dhe Rusia vendosin për Kosovën në OKB, jo Serbia.
“Vuçiq po manipulon popullin duke thënë se nuk do ta mbështes anëtarësimin e Kosovës në OKB sepse e di që Kina dhe Rusia nuk e lejojnë atë”, ka shpjeguar ai.
Presidenti i Serbisë, shtoi Trajkoviq, u zotua me Marrëveshjen e Brukselit dhe të Ohrit që të mos pengojë pranimin e Kosovës në organizatat ndërkombëtare.
Për shkak të vendimeve të Vuçiqit, ai beson se do të ndryshojnë qëndrimet e 5 vendeve të Bashkimit Evropian që aktualisht nuk e njohin pavarësinë e Kosovës.
“Ai nuk do ta nënshkruajë pavarësinë e Kosovës, por do ta njohë atë. Pranimi i Kosovës në OKB aktualisht kundërshtohet nga Kina dhe Rusia, por Vuçiq nuk e përmend anëtarësimin e Kosovës në UNESCO. Nëse Kosova pranohet në UNESCO, gjë që Vuçiq qartësisht nuk e kundërshton, të gjitha manastiret e Kishës Ortodokse Serbe do të marrin statusin e trashëgimisë kulturore të Republikës së Kosovës dhe Serbia nuk do të ketë më ndikim në mbrojtjen dhe ruajtjen e tempujve më të rëndësishëm kulturorë dhe historikë serbë”, tha ai./InLajmi/
