“Çdo luftë është disfatë. Asgjë nuk zgjidhet me luftë. Gjithçka fitohet me paqe, me dialog”.
Këto janë qëndrimet e Papa Françeskut gjatë një interviste për televizionin shtetëror italian Rai1 sa i përket konfliktit gati 1-mujor mes militantëve të Hamasit dhe Izraelit.
Duke theksuar se 2 popujt duhet të jetojnë së bashku, Ati i Shenjtë propozon një zgjidhje që sipas tij do t’i jepte fund konfliktit.
“Ata janë 2 popuj që duhet të jetojnë së bashku. Me zgjidhjen e mençur 2 popuj,2 shtete. Marrëveshja e Oslos thotë 2 shtete shumë të kufizuara dhe Jeruzalemi me status të veçantë”.
Nxitja për një zgjidhje me 2 shtete, një zgjidhje sipas së cilës Izraeli do të bashkëjetonte me një shtet të pavarur palestinez, mbështetet edhe nga SHBA-ja.
Një propozim i tillë u la në plan të 2-të që kur përpjekja e fundit e udhëhequr nga Amerika në bisedimet e paqes dështoi në vitin 2014, mes mosmarrëveshjeve për vendbanimet izraelite, lirimin e të burgosurve palestinezë dhe çështje të tjera.
Ndërsa konflikti vijon mes Izraelit dhe Hamasit ku deri më tani llogariten mbi 9.000 të vrarë në Gaza, Presidenti amerikan Joe Biden për herë të parë kërkoi një pauzë humanitare në Gaza, transmeton Klan Tv.
Biden i bëri thirrje Kryeministrit izraelit, Benjamin Netanyahu që t’u ofrojë palestinezëve një pushim të shkurtër nga operacioni ushtarak.
