Në komision nuk patën sukses që t’i bindin të tërhiqen nga greva, por nuk ndalën me kaq.
Deputët e Lëvizjes Vetëvendosje betejën me grevën e minatorëve të Trepçës e vazhduan edhe në minierën e Trepçës deri pas mensatës
Armend Muja, Halil Thaçi, Dritan Hyseni, Jeta Statovci dhe Arjeta Fejza, të gjthë këta deputetë bashkë me anëtarët e Bordit Menaxhues, me Kryesuesen, Rrezarta Pllana dhe drejtorin e Bordit, Alban Krasniqin, mbrëmë kanë negociuar me minatorët deri në orën 2 pas mesnate.
Në takimin që nisi në orën 7 në mbrëmje Kryetari i Sindikatës thotë se deputetët i ndërruan fjalët, sepse ndryshe ishin dakorduar në Zyrën e Grupit Parlamentar të Vetëvendosjes dhe në Komisionin për Ekonomi.
“(Përgjigja) nuk ka qenë definitive mirëpo ka ndryshuar sepse ata kanë kërkuar që me u shpall një konkurs deri në zgjedhjen e kryeshefit të ri. Që ka qenë e gjatë edhe minatorët nuk e kanë pranuar”, ka deklaruar Ibrahim Januzi – Kryetar i Sindikatës së Trepçës.
As për çështjen e pagave, Januzi tregon se nuk gjetën gjuhë të përbashkët.
“Edhe aty nuk ka pasur siguri sepse janë kalkuluar gjërat përmes prodhimit dhe siq e dini ne kemi ngarkes edhe shumë njësi fiktive dhe kjo nuk na ka jep siguri që edhe pagat mund të realizohen sepse nuk kanë qenë të gatshëm të japin vendim me shkrim”, ka thënë ai.
Edhe për përmirësim të kushteve të minatorëve nuk ka rezultate, përkundër që Sindikata ka lënë hapësirë që të ketë më shumë afat kohor.
Januzi tregon se mbi 200 minatorë që nga fillimi i grevës kanë pasur probleme shëndetësore, disa në gjendje më të rëndë.
