Për bastisjet nga Gjykata Speciale, gjatë ditës së hënë e po vazhdojnë edhe të martën ka reaguar ish këshilltari i ish presidentit Hashim Thaçi Adil Behramaj, i cili tha se stafi i zellshëm i Zyrës së Prokurorisë së Specializuar, ZSP po provojnë të gjejnë arsyet e dështimin duke bastisur shtëpitë tona, përcjell InLajmi.
Ai ka përmendur bastisjet e Blerim Shalës, Bashkim Smakajt të hënën dhe bastisja tek ish-këshilltari i Thaçit, Artan Behrami.
Postimi i plotë i tij:
Stafi i zellshëm i Zyrës së Prokurorit të Specializuar në Hagë, po provon t’i gjejë arsyet e dështimit të tyre nëpër shtëpitë tona. Dje shkuan te Bashkimi e Blerimi, sot tek Artani. Të gjithë këta, para se të ishin këshilltarë të presidentit, janë njerëz të dëshmuar në jetën publike dhe institucionale të shtetndërtimit të Kosovës, së bashku me bashkësinë ndërkombëtare.
Bastisja e sotme tek Artani është vazhdim i gjuetisë kundër fjalës së lirë dhe përpjekje për ta shurdhuar çdo zë kritik. Është vërtet e paprecedent kjo qasje. Është e pabesueshme sesi përndjekja po shihet si drejtësi nga kjo prokurori, e cila as që mërzitet për të drejtat e njeriut!
Nëse sjellja e kësaj prokurorie është reflektim i vlerave perëndimore për drejtësinë dhe të drejtat e njeriut, atëherë është tejet e dhimbshme ku qenkan katandisur këto vlera. Në të kundërtën, kjo sjellje nuk do të duhej të tolerohej as nga ambasadorët e shteteve të Bashkimit Evropian në Kosovë!/InLajmi/
