Deputetja e Partisë Demokratike të Kosovës, Blerta Deliu, ka reaguar ashpër ndaj kryeministrit Albin Kurti për pranimin e draftit të Be-së për Asociacionin , duke theksuar se me këtë i është shkaktuar “dëmi i pariparueshëm” për funksionimin e shtetit të Kosovës, raporton InLajmi.
Deliu-Kodra, gjatë fjalës së saj në Kuvend vazhdoi me kritika, ndërsa theksoi se Qeveria Kurti e hoqi njohjen reciproke në dialogun me Serbinë.
“Pse kaq shumë jo transparencë? Prej kujt po fshihet kryeministri? Prej qytetarëve të Kosovës? Mesazhi është i qartë, sepse politika jonë e jashtme përveçse se ka përmbysur paradigmën se nuk merremi vesh me Serbinë për asgjë, derisa të merremi vesh për gjithçka, kryeministri Kurti i ka bërë dëm të pariparushëm funksionimit të shtetit të Kosovës përmes pranimit të këtij drafti, sepse njohja reciproke nuk është askund. “Këtë nuk e përmend kryeministri. Ai e përmend Asociacionin, përmend draftin, përmend statutin, por jo njohjen de-jure të Kosovës. Kjo ka ndodhur me qeverinë e Albin Kurtit: Nga njohja reciproke në qendër, ne kemi pranim të një autonomie të serbëve të Kosovës”, tha deputetja Deliu-Kodra.
Ndaj deklarimit të Deliu-Kodrës reagoi kryeparlamentari Glauk Konjufca, i cili tha se ky fjalim i deputetes së PDK-së e legjitimon mospjesëmarrjen e mazhorancës./InLajmi/
