Kuvendi i Kosovës shkarkon kryesuesen dhe anëtarët e Bordit të Komisionit për Pavarur për Miniera dhe Minerale, KPMM-së me rekomandimin e Komisionit për Ekonomi, Industri, Ndërmarrësi dhe Tregti, raporton InLajmi.
Deputeti i Vetëvendosjes Armend Muja duke arsyetuar shkarkimin e Bordit të KPMM-së tha se anëtarët Gani Maliqi, Gani Krasniqi, Rrezarta Plakolli dhe kryesuesja Selvete Grajqevci-Pllana e kanë shkelur ligjin.
Por shkarkimi i këtij bordi u kundërshtua nga opozita e cila vlerëson se ata po shkarkohen se nuk kanë dëgjuar “urdhrat” e qeverisë.
Deputetja e LDK-së, Valentina Bunjaku-Rexhepi, gjatë debatit paralementar në Kuvend, tha se shkarkimi i këtij Bordi është i jashtëligjshëm, ndërsa konfiromn se deputetët e LDK-së nuk marrin pjesë në votim.
“Sa i përket shkarkimit të këtij bordi, debat kemi pasur edhe më herët. Fillimisht keni sjellë shkarkimin e këtyre anëtarëve dhe keni gabuar proceduralisht. Këtë Bord e keni emëruar vetë dhe tani kërkoni ta shkarkoni. Unë jam e bindur që shkarkimi i këtij bordi është për shkak se s’iu kanë dëgjuar, e jo për shkak të defekteve apo gabimeve që i kanë bërë si bord. Ky shkarkim është i jashtëligjshëm. Ata që po i emëroni e nuk po iu dëgjojnë, po sillini e po i shkarkoni. Kështu që, Lidhja Demokratike e Kosovës, nuk merr pjesë në votim, ju e keni arrogancën e numrave dhe pikërisht këtë po e shfrytëzoni”, deklaroi Bunjaku.
Shefi i Grupit Parlamentar të AAK-së, Besnik Tahiri, akuzoi partinë në pushtet për emërimet e bordeve që sipas tij janë partiake e familjare.
“Është ky bord që kur është emëruar ka pasur një lavdatë publike për këta persona të cilët sot janë para Kuvendit për shkarkim. Dua ti pyes kolegët e Vetëvendosjes, se cka ka ndryshuar tani. Se paku nuk duhet t’iu hyjnë në hak këtyre njerëzve duke I akuzuar për shkelje. Të gjitha veprimet që kanë ndodhur deri më tash në emërimin e bordeve dhe në emërimin e personave që udhëheqin agjencione të pavarura, janë të lidhura ngushtë me familjarizim e nepotizëm. Andaj, AAK-ja këtë rekomandim dhe vendim e kemi kundërshtuar edhe më herët, por e kundërshtojmë edhe këtu”, tha Tahiri.
