Shkruan: Osman Goranci
Kur në pranverë të vitit 1980, në të përjavshmen “ZËRI” u botua reportazh, im për teatrin amator të Prizrenit, me një fotografi të vitit 1956, nga shfaqja “Tezja e Çarlit”, ku në rolin kryesor ishte Bekim Fehmiu, shumë të rinjë dhe qytetarë tjerë, jo vetëm prizrenas, atëbotë më pyesnin; – “Vallë a është e mundur që ky aktor tashmë me famë botërore, ka luajtur edhe në “dërrasat që jetë janë” në Prizrenin e lashtë?” – Përgjigja ime krenare ishte PO e madhe.
Pas suksesit të madh që pati në Tiranë, të hënën në kinemanë “Cineplexx” në Prizren, u shfaq premiera e filmit dokumentar, i metrazhit të gjatë, “Bekim Fehmiu”, me skenar të gazetarit dhe publicistit Fahri Musliu dhe në regji të Valmir Tertini. Përmes këtij dokumentari të shkëlqyer, aktori shqiptar, ylli i kinematografisë botërore, Bekim Fehmiu, sërish u kthye në Prizren, në qytetin ku në qershor të vitit 2010, hiri i tij, post mortum, nisi udhëtimin në përjetësi me valet e Lumbardhit.
U lind në Sarajevë, në qershor të vitit 1936 në gjirin e një familjeje gjakovare, i biri i hoxhë Ibrahim Fehmiut dhe Hedijes, pasi i ati ishte internuar në kryeqendrën boshnjake nga autoritetet mbretërore jugosllave. Jetoi në Shkodër, Gjakovë, Prizren, Beograd!… Bekim fehmiu jetoi në Europë dhe në Amerikë, ku me rolet e tija plot shpirt dhe art i mahniti, si regjisorët, producentët, ashtu edhe miliona aderues të filmit në gjithë globin. Ishte dhe mbeti YLL filmi, i cili fliste italisht, anglisht, gjermanisht!… I propozuan ta ndërroj emrin me ndonjë emër artistik, (sikur që bëjnë shumë aktorë tjerë nëpër botë), por Bekimi mbeti i papërsëritshëm Bekim Fehmiu shqiptar.
Dokumentari i metrazhit të gjatë “Bekim Fehmiu”, ka qenë ide e kahmotshme e publicistit dhe gazetarit, Fahri Musliu, i cili bashkë me regjisorin Tërtini, dhe disa anëtarë tjerë të ekipit, për më shumë se katër vite, por që përmes një vullneti të çeliktë, duke xhiruar në Kosovë, Shqipëri, Serbi, Kroaci, Bosnjë dhe Hercegovinë, si edhe Itali, që nga vitt 2019, ia dolën që të përmbledhim përmes tregimeve dhe rrëfimeve, copëza dhe histori nga rrugëtimi i jetës me artin e për artin të aktorit të madh shqiptar Bekim Fehmiu.
Në sallën e kinemanë “Cineplexx” në Prizren, të mbushur me aderues të shumtë Artit, nga Prizreni, Gjakova, Podujeva, Prishtina, etj, edhe një herë për më shumë se një orë jetuam me madhështinë, me artin dhe njerëzoren të Bekim Fehmiut, vlerë e kombit, ashtu si do ta mbajmë gjithëherë në mend shumë gjenerata!…
Dhe, dje dhe sot, por edhe nesër, do të mendoj dhe të pyetem për këtë dokumentar, kushtuar aktorit shqiptar me famë botërore Bekim Fehmiu, i cili u realizua pa përkrahjen morale e materiale të institucionevea tona kulturore, por me vullnetin e fortë të Fahri Musliut, Valmir Tërtinit dhe anëtarëve tjerë të ekipit, që kanë patur përkrahjen e njerëzve të vullnetit të mirë në Kosovë e Shqipëri.
Por, përkundër këtij injorimi dhe HESHJTES të shumë mediave tona nacionale të cillët ndoshta nuk kanë “dëgjuar” për Bekim Fehmiun, ky dokumentar do të udhëtoj edhe nëpër shumë Metropole dhe Festivale të filmit nëpër botë, për yllin shqiptar të kalibrit botëror./InLajmi/
