Kryeministri i vendit, Albin Kurti, i është përgjigjur pozitivisht kërkesës së pesë emisarëve evropianë për një takim me liderët e Gjermanisë, Francës dhe Italisë në margjina të samitit të Këshillit Evropian.Gjatë kësaj kohe kryeministri Kurti pritet të zhvillojë takim edhe me presidentin e Serbisë, Aleksandër Vuçiq në lidhje me rifillimin e dialogut dhe draftin e ri që i është propozuar për Asociacionin.
Për të folur në lidhje me këto takim dhe se çfarë pritet të diskutohet, ka dhënë një intervistë për “Gazeta Blic”, ish-ministrja e Integrimeve Evropiane, Mimoza Ahmetaj.
Ahmetaj tha se ky Samit është një platformë e mirë për kryeministrin Kurti që të mund të kontaktoj drejpërdrejtë me liderët e shteteve të BE-së dhe të dëgjohet sa i përket ngjarjeve të 24 shtatorit në veri të Kosovës.
“I gjendur nën sanksione dhe i izoluar nga bota demokratike, Samiti i nesërm i liderëve të shteteve anëtare të BE-së, për zotin Kurti është platformë e mirë dhe mundësi që të kontaktoj drejpërdrejtë me liderët e shteteve të BE-së dhe të dëgjohet sa i përket ngjarjeve të 24 shtatorit në veri të Kosovës.Dialogu është mënyra për ta nxjerrë nga “guaska” në të cilën ai ndodhet tash e një kohë” deklaroi Ahmetaj për “Gazeta Blic”Ajo tutje u shpreh skeptike se ky takim mund të sjellë një marrëveshje konkrete.
“Do të doja që të kemi një marrëveshje finale nga ky takim, por druaj se si të gjitha të tjerat deri tani, ky takim do të jetë më tepër “defilim” në Bruksel sesa që do të sjellë marrëveshje konkrete. Kjo edhe për faktin se Serbia do të ketë zgjedhje në dhjetor të ketij viti dhe nënshkrimi i marrëveshjes me Kosovën për Vuciqin në kohë të fushatës zgjedhore, do të përkthehej në ndëshkim nga votuesit” deklaroi ish-ministrja e Integrimeve Evropiane”.
Zëdhënësi i BE-së, Peter Stano, ka deklaruar se emisarët evropianë, gjatë vizitës së zhvilluar me 21 tetor në Koosvë dhe Serbi, kanë paraqitur një propozim “modern evropian” për Asociacionin e komunave me shumicë serbe
Ai njoftoi gjithashtu se se blloku ka ftuar në Bruksel të enjten, më 26 tetor, kryeministrin e Kosovës, Albin Kurti, dhe presidentin e Serbisë, Aleksandar Vuçiq, kur do të mbahet samiti i BE-së.
“Diskutimet e të dërguarit të posaçëm (të BE-së për dialogun Kosovë-Serbi), Mirosllav Lajçak, gjatë fundjavës në Beograd dhe Prishtinë ishin të fokusuara në zbatimin e Aneksit të Ohrit. Nuk ka ndonjë qëllim që ai të zëvendësohet. U diskutuan propozime dhe ide të ndryshme, disa me shkrim dhe këto diskutime do të vazhdojnë. Kjo po ashtu përfshin edhe një propozim modern evropian për statutin e Asociacionit të komunave me shumicë serbe” deklaroi Stano.
