Ditën e neserme pritet të vijnë në Prishtinë, i dërguari i Bashkimit Evropian për bisedimet Kosovë-Serbi, Miroslav Lajçak së bashku me të dërguarin e Shteteve të Bashkuara Gabriel Escobar si dhe këshilltarët e udhëheqësve të Francës, Gjermanisë dhe Italisë.
Vizita e tyre vjen pas sulmit terrorist në Banjskë si një përpjekje për të rifilluar bisedimet për normalizimin e marrëdhënieve Koosvë-Serbi.
Në lidhje me vizitën e tyre në Kosovë ka folur për “Gazeta Blic” profesori i shkencave politike nga Mitrovica, Nexhmedin Spahiu.
Spahiu tha se Kosova nuk duhet t’i ikë tryezës së dhe se çfarë largimi do të dëmtonte interesat kombëtare të Kosovës.
“Nuk është Kosova ajo që përcakton ‘rregullat e lojës’, tjetër kush i përcakton ato. Kosova nuk duhet t’i ikë tavolinës së bisedimeve, është në pozitën që nuk guxon me i ik bisedime dhe çfarëdo largimi dëmton interesat kombëtare të Kosovës” tha Spahiu për “Gazeta Blic”
Në prag të vizitë së diplomatëve është deklaruar edhe kryeministri i vednit, Albin Kurti.
Kurti tha se nuk mund të ketë normalizim të raporteve me Serbinë, pa pasur siguri në Kosovë.
“Çka do të kërkojnë dhe çfarë do të ofrojnë e marrim vesh nesër. Unë mund të them se nuk mund të kemi normalizim pa siguri dhe siguria e Kosovës duhet të jetë prioritet edhe për institucionet e shtetit, për popullin dhe shoqërinë”, tha Kurti
Më 21 tetor, në Kosovë dhe Serbi, i dërguari i Bashkimit Evropian për dialogun, Mirosllav Lajçak, së bashku me emisarët e Gjermanisë, Francës, Italisë dhe Shteteve të Bashkuara do të takohet në Prishtinë me kryeministrin e Kosovës, Albin Kurti, dhe në Beogradi me presidentin serb, Aleksandar Vuçiq.
