Deputeti i pavarur Haki Abazi ka akuzuar pushtetin për sjelljen jo të dinjitetshme karshi Policisë së Kosovës, duke theksuar se është poshtërsinë e pushtetarëve që të marrin pjesë në varrimin e rreshterit Afrim Bunjaku, por të mungojnë në seancën e jashtëzakonshme për mbështetjen e Policisë së Kosovës, raporton InLajmi.
Deputeti Abazi, përmendi edhe sulmin e 24 shtatorit, ndërsa pyet kryeministrin Kurti se kush ka dhënë urdhër që “Radojiçiqi me cubat e tij” të ecin maleve të Kosovës, “pa asnjë therë në këmbë”.
“Pse është tradhtuar Policia e Kosovës dhe është lëshu Radojçiqi, pasi që kryeministri ka dalë në media dhe ka thënë që Banjska ka qenë e rrethume nga forcat policore të Kosovës. Kush ka dhënë urdhër që Radojiçiqi me cubat e tij të ecin maleve të Kosovës pa asnjë therë në këmbë?”, tha Abazi.
Ai gjithashty pyeti nëse është duke u punuar në amandementimin e ligjit për pagat e policisë.
“VV goditi shtetin me molotov, u vranë njerëz për kauzat e tyre të rrejshme, sot nuk janë në Kuvend për Policinë. A është duke u koordinuar prapë Mimoza Kusari me Radojiçiqin dhe qysh Radojiçiqi me 90 cuba arriti me u largu nga rrethimi i hekurt i Kurtit edhe nëse është e vërtet që po a amandameton ligjin për pagesën e policisë, kjo është e ulët, kur 3 vite pas, kur një parti parlamentare që është pjesë e politikës, guximin me ikë prej demokracisë nuk mundet me pas kurrkush.Sidomos jo ata që kanë gjujtë gaz lotsjellës, e kanë goditë shtetin me molotov, ka pas të vramë për kauza të rrejshme, dalin blejnë lule të Holandës për me i qitë në varrezat e policëve të vramë dhe përqafin anëtarët e familjes për poenë politikë e fotografi të Facebook. Por kur vjen puna për avancim të sektorit të sigurisë, nuk vijnë këtu”, tha Abazi.
