Shkruan : Blerim Valla
Teatri “Hadi Shehu” i Gjakovës dhe ai “Bekim Fehmiu” i Prizren janë bashkuar për realizimin e shfaqjes “Masë për masë” të Uilliam Shekspirit, që është edhe premiera e dytë për këtë vit e teatrit gjakovarë. Kjo është shfaqja e dytë premierë e teatrit “Hadi Shehu” për sivjet pasi në mars të këtij viti ishte dhënë premiera e parë, shfaqja “Antigonat”.
Shfaqja është bashkëprodhim mes Teatrit të Gjakovës dhe atij të Prizerenit ku interpretojnë 14 aktorë si Vlera Pylla, Besfort Berberi , Vlora Dervishi, Edi Kastrati, Edmond Hafizademi, Altina Kusari. Edi Gjakova, pastaj Xhevdet Doda , Butrint Lumi, Edona Sopaj, Alban Çela, Alban Krasniqi, Valmira Lumi e Valmir Krasniqi. Skenografinë e shfaqjes e punoi Petrit Bakalli, kostumografinë Iliriana Loxha, koreografinë Robert Nuha, kompozitor është Memli Kelmendi,
Me regji tejet interesante dhe të guximshme të regjisorit të njohur Altin Basha, ashtu siç din vetëm ai me realizimin e shfaqjeve masive me shume aktorë, pastaj me një koreografi mjeshtërore, skenografi statike por shume funksionale, dhe me muzikë brilante që moti nuk është përjetuar ne skenën teatrore të Gjakovës, por edhe me kostumet qe përshtaten shume bukur me situatat dhe ngjarjen e shfaqjes .
Ndonëse e shkruar në shekullin e 17 – të, kjo komedi e zezë shumë bukur arrinë të ndërlidhet me gjendjen aktuale të shoqërisë sonë shqiptare – keqpërdorimin e pushtetit për interesa personale dhe për tu hakmarrë kundërshtarëve qoftë atyre politikë apo edhe atyre në dashuri
Është tekst politik,dhe i takon teatrit politik i ndërthurrur bukur me notat e komedisë qoftë me situatat por edhe me karakteret e personazheve . Është komedi e zezë e cila, edhe pse e shkruar shume kohe më parë nga Shekspiri prapëseprapë është aktuale pasi dihet vlera e veprave te Shekspirit te cilat kurdo herë që luhen zgjojnë interesim të madh tek publiku anembanë botës.
Shfaqja është komedi e zezë që trajton abuzimin nga njerëzit e pushtetshëm dhe përmban lojë fjalësh dhe ironi therrëse sikurse edhe elemente tragjike. “Masë për masë” paraqet rrëfimin për protagonistin Dukën Vincentio të Vjenës, që vëzhgon punët e qytetit nën qeverisjen e zëvendësit të tij, Angelos, i cili abuzon dhe keqpërdoron me pushtetin e dhënë nga Duka. Ai shfrytëzon fuqinë dhe pushtetin për interesa personale, për të abuzuar me femra të ndryshme që gjenden në vështirësi, pastaj për t’ju hakmarrë kundërshtarëve të tij dhe për të siguruar të mira personale.
Temat kryesore të shfaqjes përfshijnë drejtësinë, moralin por edhe mëshirën në Vjenë pasi shfaqja ka të bëjë edhe me korrupsionin dhe punët e ndyra. Por si në jetë ashtu edhe në këtë shfaqje, fiton e vërteta dhe drejtësia, mëshira dhe virtyti mbizotërojnë mbi të keqen, intrigat, shpifjet, lakmia për pozitë dhe për pushtet. Dhe shfaqja nuk ka përfundim tragjik.
Komedia “Masë për masë” kalon nëpër disa nga masat kryesore mes masave të tjera duke përfshirë: pushteti, prostitucioni, amoraliteti, martesë feja, roli i femrës, Gjykimi dhe Ndëshkimi.
Shfaqja “Masë për ë Masë” na sygjeron se si dhe deri në ç’masë një person mund të gjykojë një tjetër vetëm pse ka pushtet dhe është në ëpozitë të lartë në pushtet . Vetëm për shkak se dikush mban një pozitë të pushtetit nuk tregon se ata janë moralisht superior!
Shumica e komedive të Shekspirit festohet nga një martesë, ashtu si në përrallat, si një fund i lumtur. Megjithatë, në shfaqjen ”Masë për masë” martesa përdoret si dënim, Angelo detyrohet të martohet me Mariana dhe Lucio detyrohet të martohet me zonjën Overdone. Ky vështrim cinik në martesë si dënim është i pazakontë në një komedi. Ironikisht, në këtë shfaqje, martesa përdoret për të rregulluar dhe për të ndëshkuar sjelljen e keqe.
Temat kryesore të kësaj shfaqjeje janë pra ato që lidhen me fenë; moralit, virtytit, mëkatit, dënimit, vdekjes dhe shlyerjes. Karakteri kryesor i shfaqjes është murgesha Isabella , interpretuar jashtëzakonisht mirë, nga njëra prej aktoreve më të mira që ka për momentin Teatri i Gjakovës, nga aktorja Vlera Pylla, e cila në shfaqje është e obsesionuar me virtytin e dëlirësinë dhe udhëtimin e saj shpirtëror drejt së vërtetës dhe drejtësisë!
Me lojë të mirë, ndonëse në rol dytësor. është dalluar edhe kësaj here, aktori fenomenal Edmond Hafizademi, por edhe aktorët e tjerë të shfaqjes. Teatri i Qytetit “Hadi Shehu” i Gjakovës tashmë ka një kastë aktorësh të rinj shumë të mirë e të talentuar, të afirmuar dhe të shpërblyer nëpër shumë skena teatrore brenda dhe jashtë Kosovës, si B. Ahmeti, V. Pylla, E, Hafizademi, B. Berberi, V. Dervishi, E. Kastrati, A. Kusari, Y. Lota etj. /InLajmi/
