Ligjvënësit e Partisë Demokratike të Kosovës PDK dhe të Aleancës për Ardhmërinë e Kosovës AAK nuk do t’i votojnë Marrëveshjet Ndërkombëtare, as në seancën e të enjtes të Kuvendit të Kosovës. Kështu deklaruan deputetët nga këto dy subjekte politike, të cilët thonë se Marrëveshjet Ndërkombëtare do të votohen vetëm nëse dakordohen për datën e zgjedhjeve të parakohshme.
Nesër pritet të mbahet seanca plenare, ku në rend ditë është votimi për ratifikimin e pesë Marrëveshjeve Ndërkombëtare të cilat nuk kanë arritur të votohen që nga fillimi i sesionit vjeshtor.
Deputetë të opozitës, nga PDK dhe AAK, i thanë Radio Kosovës se as në seancën e radhës nuk do t’i votojnë këto marrëveshje. Deputeti i PDK-së, Ferat Shala tha se Marrëveshjet Ndërkombëtare do të votohen atëherë, kur të plotësohen kërkesat e tyre. Zgjedhjet e parakohshme dhe heqja e sanksioneve ndërkombëtare janë kërkesat e PDK-së.
“Si rezultat i keqmenaxhimit të politikave të jashtme dhe të brendshme tashmë Kosova është nën sanksione ndërkombëtare dhe pastaj është çështja e faktorëve të tjerë në këtë relacion. Po ashtu ne do t’i votojmë Marrëveshjet Ndërkombëtare, atëherë kur do të dakordohemi për datën e zgjedhjeve të ardhshme të parakohshme parlamentare, për shkak të situatës së krijuar në vend dhe për shkak të gjithë kësaj që edhe në sferën diplomatike dhe politike e ekonomike vendi po degradon”, tha ai.
Shala tha se edhe nëse votohen marrëveshjet ndërkombëtare, të gjitha fondet janë të ngrira si rezultat që Kosova është nën sanksione.
Ndërsa deputeti Pal Lekaj tha se me vendim të kryesisë së AAK-së, Marrëveshjet Ndërkombëtare, as nesër nuk do të votohen. Lekaj tha se qeveria duhet të mos e injorojë opozitën, sepse zëri i tyre është zëri i qytetarëve.
“Ne kemi kërkuar nga qeveria që të ulemi të bisedojmë dhe votohen amendamentet që ne i propozojmë, për shembull, amendamentin për koeficientin e pagave që do të ketë edhe seancë të jashtëzakonshme javën e ardhshme. Nëse e votojnë rezolutën atëherë ne do të ndryshojmë në qëndrim”, deklaroi Lekaj.
Ai shtoi se Qeveria e Kosovës e ka sjellë vendin në sanksione ndërkombëtare, ndërsa tani po kërkon të votohen Marrëveshjet Ndërkombëtare. Ai tha se si pasojë e këtyre sanksioneve, janë bllokuar 500 milionë euro projekte.
Ndërsa nga Lidhja Demokratike e Kosovës Arben Gashi, kishte deklaruar për media se do t’i votojnë të gjitha marrëveshjet ndërkombëtare, përveç asaj më OPEC-un për arsye se siç ka deklaruar Gashi, “një pjesë e madhe e anëtarëve të kësaj organizate janë shtete diktatoriale, të cilat duan të na imponojnë një sistem fiskal që është i kundërt me atë të vendeve demokratike partnere të Kosovës, është sistem i kundërt me atë të FMN-së dhe Bankës Botërore”.
