Analisti politik, Dardan Sejdiu, ka thënë se Edi Rama ka arritur ta bind BE-në dhe partnerët euro-atlantikë se ka të ardhme në Ballkanin Perëndimor, dhe ka të ardhme me BP në BE.
Këtë ai thotë se e ka me kohë dhe mënyrë goxha të mirë, por edhe me gabime rrugës.
“Çdo veprim politik dhe një intensitet i veprimeve politike, që e ka ndërmarr Rama në dekadën e fundit, normalisht sjellin edhe gabime. Mosveprimi normal që nuk sjell gabime. Kur qëndron në një pozicion të fortë nacionalist, është vështirë me e kundërshtu. Rama është një prej politikanëve të rrallë në BP që ka krijuar lehtësi në aspektin e kuptimit të BP prej diplomatëve, kancelarëve, presidentëve të BE-ës, dhe këtë duhet me ia pranuar”.
“Këtë e ka bërë përmes bashkërendimit të ngushtë me shtetet e BE-së, të ShBA-së, me rëndësinë që ia jep Shqipërisë në instrumente të sigurisë të NATO-s dhe gjithashtu edhe me intensitetin e punës që e bën në promovimin e Shqipërisë si njëfarë destinacioni të ri në Evropë. Dhe krejt këto e krijojnë një mozaik të një vendi në BP që është edhe i lehtë, edhe pozitiv edhe zhvillimor”, u shpreh Sejdiu.
Ai tha se Shqipëria mund të kritikohet për zhvillimin ekonomik, mirëpo konsideron se vendi nga perëndimi po shihet si vend i zhvilluar.
“Mund të kemi kritika për zhvillimin ekonomik, por hovin e zhvillimit dhe mënyrën se si Shqipëria po perceptohet tash e disa vite nga Bashkimi Evropian, nga shtete anëtare të NATO-s, na lë të kuptojmë që ky samit sot nuk është rastësi, por një rezultat i një angazhimi disavjeçar i qeverisë të Ramës, sikurse që ka qenë angazhim disavjeçar i Berishës për anëtarësim në NATO”, deklaroi Sejdiu.
