Ministri i Shëndetësisë i Kosovës, Arben Vitia, ka reaguar me rastin e helmimin në qytetin e Malishevës, ku 100 qytetarë kanë kërkuar ndihmë mjekësore, përcjell InLajmi.
Ministri ndër të tjera ka bërë të ditur se në QKUK në Prishtinë janë të hospitalizuar 11 qytetarë, kurse 9 të tjerë janë në Spitalin e përgjithshëm të Prizrenit.
Vitia njoftoi se gjendja e të gjithë të hospitalizuarave pas marrjes së trajtimit mjekësor është e qetë dhe stabile.
Postimi i plotë i tij:
Mbrëmë, menjëherë pasi u njoftuam për rastin e helmimit të 68 qytetarëve në Komunën e Malishevës bashkë me drejtorin e SHSKUK-së i vizituam të hospitalizuarit në Klinikën Infektive në QKUK.
Në QKUK të hospitalizuar janë 11 qytetarë dhe 9 qytetarë të tjerë janë në Spitalin e përgjithshëm të Prizrenit.
Gjendja e të gjithë të hospitalizuarave pas marrjes së trajtimit mjekësor është e qetë dhe stabile.
Inspektoratet dhe organet ligjzbatuese janë në terren dhe kanë marrë të gjitha të dhënat lidhur me rastin dhe burimin e shkakun e helmimit./InLajmi/
