Drejtori i Zyrës së Qeverisë së Serbisë për Kosovë, Petar Petkoviq, ka vlerësuar sot se qëndrimi i Prishtinës se zgjedhjet në 4 komuna në veri të Kosovës mund të mbahen vetëm në bazë të udhëzimit administrativ që është miratuar së fundmi. tregon se kryeministri i Kosovës, Albin Kurti, nuk dëshiron t’i zhvillojë ato zgjedhje, transmeton InLajmi.
Petkoviq tha se Kurti “qëllimisht e ka ndërlikuar” procedurën e zgjedhjeve, sepse po kërkon një mënyrë për t’i shmangur dhe shtyrë ato, “sepse e di se serbët do t’i jepnin fund gauleiterëve (kryetarëve të komunave shqiptare) të tij”.
“I ashtuquajturi udhëzim administrativ nuk është gjë tjetër veçse mënyra se si Kurti dëshiron të mbajë me çdo kusht kryetarët e rrejshëm dhe këshilltarët e tyre që kanë pushtuar veriun. “Gauleiterët e Kurtit, të cilët fituan 3.5% të votave të shqiptarëve në zgjedhjet e kontejnerëve në veri, nuk përfaqësojnë askënd dhe prandaj nuk kanë legjitimitet”, tha ai.
Qeveria e Kosovës tha se nuk i shpall zgjedhjet, por se i përkrah dhe se për mbajtjen e tyre është e nevojshme që në përputhje me udhëzimet administrative, qytetarët nga veriu, të iniciojnë një peticion për shkarkimin e kryetarëve të atyre komunave.
Petkoviq tha se terrori i Kurtit u intensifikua pas zgjedhjeve të prillit, në të cilat serbët nuk morën pjesë, ka për qëllim “spastrimin etnik të popullit serb, veçanërisht nga veriu i Kosovës”.
“Për shkak të presionit dhe dhunës së paprecedentë të të ashtuquajturve e policisë së Kosovës ndaj serbëve, zgjidhja e vetme për deeskalim të menjëhershëm është mbajtja e zgjedhjeve në veri, si dhe tërheqja e policisë speciale të Kurtit”, tha drejtori i zyrës qeveritare.
Sipas fjalëve të tij, Kurti “qëllimisht e ndërlikoi situatën” me një udhëzim administrativ, duke futur një “procedurë të pakuptimtë” që përfshin peticionin, pastaj shpalljen e referendumit dhe vetëm në fund mbajtjen e zgjedhjeve, të gjitha me afate të gjata, shkruan Danas.
“Me këtë Kurti është pajtuar më drejtpërdrejt me përfaqësuesit e BE-së dhe SHBA-së, duke qenë se publikisht ka premtuar organizimin e zgjedhjeve. Kjo nuk është për t’u habitur sepse të gjithë e kanë parë se Kurti nuk është paqebërës, por zjarrvënës ballkanik, i cili nuk dëshiron zgjedhje në veri dhe që personalisht ka urdhëruar kryetarët e tij të rremë të mos japin dorëheqje”, tha Petkoviq./InLajmi/
