Kryeministri i vendit, Albin Kurti, pas takimit tha se me senatorët amerikanë Jeanne Shaheen dhe Peter Welch është diskutuar për agresionin e 24 shtatorit, raporton InLajmi.
Shefi i ekzekutivit të vendit përsëriti se dialogu me Serbinë nuk mund të vazhdojë sikur nuk ka ndodhur asgjë.
“Mbi të gjitha dëshiroj të falënderoj ata për mbështetjen e fortë ndaj Kosovës, veçanërisht pas sulmit të 24 shtatorit. Siguria në Kosovë ishte pika kryesore e temës sonë dhe ua prezantova senatorëve të dhënat e freskëta pas sulmit të 24 shtatorit”, tha Kurti.
Tutje është shprehur kryeministri se dëshmitë tregojnë se sulmi ishte pjesë e planit për aneksimin e veriut.
“Përfshirja e Serbisë ka ndodhur të paktën në 4 shtresa për mbështetjen e sulmeve terroriste në Banjskë. Kemi dëshmi se sulmi ka qenë pjesë e një plani më të gjerë për aneksimin e veriut të Kosovës përmes sulmeve të koordinuara, përmes një themelimi të një korridori për furnizim të armëve në veriun e Kosovës”, deklaroi kryeministri Kurti./InLajmi/
