Në mungesë kuorumi ka dështuar shqyrtimi i peticionit të Sindikatës së Policisë së Kosovës, kurse dështim erdhi si rezultat i mungesës së deputetëve të mazhorancës në mbledhjen e Komisionit për të Drejtat e Njeriut, raporton InLajmi.
Pavarësisht kësaj, kryetarja e këtij komisioni, Duda Balje, vendosi që pavarësisht mungesës se kuorumit t’i dëgjojnë përfaqësuesit e Sindikatës sё Policisë sё Kosovës në lidhje arsyet organizimit të këtij peticioni.
Imer Zeqiri, kryetar i Sindikatës së Policisë së Kosovë para deputetëve të pranishëm ka listuar kërkesat e renditura në peticion, duke theksuar nevojën për sigurime shëndetësore dhe shtesat për rrezikshmëri.
Avni Hoti, nënkryetar i Sindikatës së Policisë së Kosovës tha se përfaqëson të gjithë kolegët e tij dhe se kërkesat e tyre janë të arsyeshme.
“2 ngjarjet e djeshit, njëra ne parlament e tjetra në konferencë për shtyp, më kanë shty me ardh këtu sot, 2 tabore që luftojnë njëra tjetrën. Luftën kryesore, kauzën kryesore e kanë Policinë e Kosovës, këta njerëz qe sa vjet pas lufte nuk i zgjodhën problemet e policëve, as pozita e as opozita”, tha Hoti, duke kërkuar që subjektet politike të mos e shndërrojnë në kauzë policinë.
“Ju kisha lutë mos e boni kauzë Policinë e Kosovës. Nuk kemi tjetër partner social përveç Qeverisë së Kosovës. Me disa gjana po na dëmtoni, mos na përdorni. Lutje publike nga gjithë policët e Kosovës zgjidhni problemet tona. Kur një polic i Kosovës është gjetur i vrarë, në xhep i ka pas vetëm 1.70 cent, të gjithë janë në kredi, në gjysmë të muajit ata nuk e kanë asnjë cent në llogari, me paga të vogla, pa shujta, pa shtesa të rrezikshmërisë e pa sigurime shëndetësore”, u shpreh Hoti.
Në mbledhje ishin deputetja e PDK-së, Ariana Musliu-Shoshi, Marigona Geci nga LDK dhe Albana Bytyqi nga AAK.
Kurse 5 deputetët e grupi parlamentar të LVV-së, Arjeta Fejza, Fatmire Kollçaku, Labinotë Demi, Drita Millaku, Nasuf Bejta munguan në mbledhje të Komisionit./InLajmi/
