Deputeti i Lidhjes Demokratike të Kosovës, Avdullah Hoti, ka kujtuar se pas sulmit në veri Kosova është një moment të ri në procesin e dialogut, ndërsa është shprehur ai se lidershipi i Kosovës duhet të shfrytëzojë këtë moment për të rivendosur bashkëpunimin e cenuar me aleatë, përcjell InLajmi.
Hoti i kujton lidershipit të Kosovës se tani është momenti që të rivendoset edhe bashkëpunimi i shëndosh me aelatët për avancim të integrimit euro-atlantik, e jo për politikë të brendshme.
Gjithashtu Hoti ka theksuar se lidershipi i Kosovës duhet të jetë i kujdesshëm në deklarime dhe kushtëzime lidhur me procesin e dialogut, duke thënë se kushtëzimet vetëm “na izolojnë”.
Hoti ka thënë se dialogu i Kosovës është para së gjithash me Brukselin dhe Washingtonin dhe se përmes këtyre qendrave kalon rruga e vendit për në Bashkimin Evropian dh NATO.
Për më tepër Hoti është shprehur se lidershipi i Kosovës duhet të fokusohet në ndërtimin e konsensusit me aleatët tanë, e për t’ia mbushur mendjen botës se çfarë është fqinji jonë verior.
Ai tha se inteligjenca informative e aleatëve nuk ka nevojë për deklarime ditore të lidershipit të Kosovës.
Deklarata e tij vjen pasi pasi Presidentja Vjosa Osmani tha se s’ka arsye për t’u takuar me Presidentin e Serbisë, Aleksandër Vuçiq pa u sanksionuar Serbia.
Postimi i plotë i tij:
Lidhur me dialogun në rrethanat e reja pas sulmit terrorist në Banjskë
E para, tani është një moment i ri në proces të dialogut për normalizimit të marrëdhënieve me fqinjin tonë agresor. Në koordinim me aleatët, lidershipi i Kosovës duhet të shfrytëzojë këtë moment për të rivendosur bashkëpunimin e cenuar me aleatët dhe për avancim të integrimit euro-atlantik, e jo për politikë të brendshme siç po vepron tani.
E 2-ta, lidershipi i Kosovës duhet të jetë i kujdesshëm në deklarime dhe kushtëzime lidhur me dialogun. Dialogu jonë është para se gjithash me Brukselin e Uashingtonin. Përmes tyre qendrave kalon rruga e Kosovës për BE dhe NATO. Rrugë tjetër nuk ka. Kushtëzimet na izolojnë. Shpresoj që kësaj radhe lidershipi i Kosovës ka zënë mend për rëndësinë e respektimit të këshillave të aleatëve, të cilët në çdo moment po e garantojnë kushtetutshmërinë dhe integritetin territorial e sovranitetin e shtetit të Kosovës.
E 3-ta, duhet rindërtuar konsensusi dhe dakordimi me aleatët tanë, i cili dakordim ka ekzistuar në qeverinë paraprake, për një proces dialogu që shpie tek marrëveshja për njohje reciproke si e vetmja zgjidhje për paqe të përhershme në këtë pjesë të Evropës. Lidershipi i Kosovës duhet të fokusohet në ndërtimin e këtij konsensusi me aleatët tanë, e jo në agjendë triviale për t’ia mbushur mendjen botës se çfarë është fqinji jonë verior. Jam i bindur se inteligjenca informative e aleatëve nuk ka nevojë për deklarime ditore të lidershipit të Kosovës./InLajmi/
