Deputeti i Parlamentit Evropian Klemen Groshel tha sot se mund të flasim për sanksione ndaj Serbisë kur të vërtetohet se çfarë ka ndodhur në Banjskë, në veri të Kosovës, transmeton InLajmi.
“Kur e dimë se çfarë ka ndodhur, mund të flasim për sanksione”, tha Groshel për televizionin N1.
Ai tha se nëse vendosen sanksione, do të bëhet fjalë për sanksione politike dhe të tjera ndaj përgjegjësve për ngjarjet në Kosovë, e jo ndaj Serbisë në përgjithësi.
Groshel shtoi se të gjitha vendet e Bashkimit Evropian duhet të bien dakord për sanksionet dhe se çështja është se si do të votojë kryeministri hungarez Viktor Orban.
Ai shtoi se niveli i parë i sanksioneve mund të jetë reduktimi i marrëdhënieve diplomatike dhe më pas sanksionet financiare lidhur me personat e përfshirë në ngjarje.
“Para së gjithash, do të shkojë në drejtim të sanksionimit të autorëve”, tha Groshel./InLajmi/
