Qindra njerëz dyshohet se kanë vdekur dhe mijëra të tjerë janë plagosur si pasojë e një tërmeti të fuqishëm që goditi Afganistanin perëndimor, afër kufirit iranian. Autoritetet dyshojnë se numri i viktimave është shumë më i lartë. Tërmeti me magnitudë 6.3 shkatërroi të paktën 12 fshatra pranë qytetit të Heratit të Afganistanit.
Tërmeti pati pasgoditje të fuqishme. Të mbijetuarit e përshkruan tmerrin që kanë përjetuar teksa ndërtesat u shembën rreth tyre. Punonjësit e kërkim-shpëtimit punuan gjatë gjithë natës duke u përpjekur të gjenin të mbijetuar të bllokuar nën rrënoja.
“Ishim në zyrat tona dhe papritmas ndërtesa filloi të dridhej. Suvaja e mureve filloi të binte dhe muret u plasaritën, disa mure dhe pjesë të ndërtesës u shembën. Nuk mund të kontaktoj me familjen time… Jam shumë i shqetësuar dhe i frikësuar, ishte e tmerrshme”, tha banori i Heratit, Bashir Ahmad.
“Situata ishte shumë e tmerrshme, unë kurrë nuk kam përjetuar një gjë të tillë,” tha studenti Idrees Arsala për AFP.
Herati ndodhet 120 km në lindje të kufirit iranian dhe konsiderohet të jetë kryeqyteti kulturor i Afganistanit, transmeton Klan. tv
Afganistani goditet shpesh nga tërmetet, veçanërisht në vargun malor Hindu Kush pasi shtrihet pranë kryqëzimit të pllakave tektonike euroaziatike dhe indiane. Në Qershor të vitit të kaluar, Patika u godit nga një tërmet me magnitudë 5.9 i cili vrau më shumë se 1.000 njerëz dhe la dhjetëra-mijëra të pastrehë