Një grua është vrarë dhe 2 të tjerë janë plagosur rëndë pasi mijëra raketa u hodhën nga Rripi i Gazës drejt Izraelit, thanë shërbimet izraelite të emergjencës. Hamasi pretendon se ka lëshuar 5.000 raketa kundër Izraelit në atë që e ka quajtur ‘Stuhia Al-Aksa’.
Sirenat e alarmit ranë në jug të Izraelit dhe mund të dëgjoheshin në zonën më të madhe të Tel Avivit të shtunën në mëngjes. Radioja ushtarake flet për lëshime të mëdha raketash nga Gaza, disa prej të cilave kapen nga bateritë mbrojtëse izraelite Iron Dome. Sulmi filloi teksa fëmijët ishin rrugës për në shkollë.
Grupi militant palestinez islamik Hamas ka marrë përgjegjësinë për sulmin. Dhjetëra mijëra mbështetës të Xhihadit Islamik u mblodhën në Gaza të premten për të festuar përvjetorin e themelimit të lëvizjes.
Pamjet nga agjencia e lajmeve Reuters tregojnë zjarrfikësit izraelitë duke luftuar flakët në qytetin e Ashkelon, ndërsa shtëllunga të dendura tymi ngriheshin nga automjetet e djegura.
Një raport fillestar nga Forcat e Mbrojtjes së Izraelit (IDF), tha se një “numër terroristësh” ishin infiltruar në territorin izraelit nga Rripi i Gazës dhe se banorëve në zonat përreth u është kërkuar të qëndrojnë në shtëpitë e tyre.
Zyra e kryeministrit Benjamin Netanyahu tha se ai do të takohet me zyrtarë të lartë të sigurisë në orët e ardhshme.
Banorët e Gazës thanë se dëgjuan përleshje të armatosura përgjatë gardhit ndarës me Izraelin, pranë qytetit jugor të Khan Younis dhe panë lëvizje të konsiderueshme të luftëtarëve të armatosur, shkruan A2CNN.
Ushtria izraelite ka shpallur “gjendjen e alarmit të luftës”. Zëdhënësi ushtarak kujtoi se “organizata terroriste Hamas ka filluar të lëshojë raketa masive drejt territorit izraelit dhe në disa vende”. Izraeli ka vendosur të tërheqë rezervistët e tij.
