Peizazhi natyror me 2 parqet kombëtare, atë të Korabit në Lindje dhe Lurës në Perëndim, e ndërthurur edhe me elementë historikë, socialë e kulturorë e bën zonën e Dibrës mjaft tërheqëse.
Tashmë Dibra është më pak se një orë e gjysmë larg Tiranës, ndaj themi se është lehtësuar mjaft rruga për t’i vizituar këto bukuri të natyrës. Grama është një nga Destinacionet e shumta që ofron Dibra.
Vetëm një orë larg nga Peshkopia, me t’u ngritur në Bjeshkë, peizazhi është i mahnitshëm, qyteti duket sikur e shikon nga ajri.
Këto atraksione të gërshetuara mjaft bukur natyrën, me ajrin e pastër dhe kuzhinën tradicionale dibrane, të cilën turistët vendas apo të huaj mund ta shijojnë në bujtinat dhe stanet e shumta në këtë zonë malore.
Ilmi Spata është 86 vjeç dhe për çdo vit vjen nga qershori deri në shtator, bashkë me të shoqen dhe rrinë e shijojnë ajrin e pastër dhe lulet e Bjeshkës. Këtë gjë bëjnë prej më shumë se 25 vitesh.
Për të apasionuarit e natyrës dhe pas ecjes, mali i Gramës është një ndër destinacionet që nuk do t’ju zhgënjejë në asnjë moment. Kur ngjitesh kupton madhështinë e këtyre Bjeshkëve, të cilat duket sikur nuk kanë fund, e ku hije rëndë pranë saj qëndron edhe mali i Korabit. Është një ndër rrugët me panoramike e kësaj zone, ku në kontakt me natyrën kupton se këtu çdo gjë është ruajtur me fanatizëm nga banorët e zonës, të cilët në bazë të ligjeve të pashkruar përfshinin edhe mbrojtjen dhe mos cenimin e pyjeve.
Të konsideruara perlat e Dibrës, Bjeshkët e Gramës janë një nga pikat kyçe të Parkut Kombëtar Korab-Koritnik dhe ndodhet në një lartësi prej 2,345 metra. E pozicionuar vetëm 9 km larg Peshkopisë, Grama është destinacion i magjishëm malor i pasur me pyjet e pisha të buta, bredha dhe ah shekullorë, me liqenin akullnajor, apo edhe me stanet dhe burimet e kristalta ujore.
Malet dhe Bjeshkët e këtij territori janë të pasura me bimë mjekësore dhe ku rriten shumë kafshë të egra të rralla si reqebulli ose (Tigri i Ballkanit), dhia e egër, thëllëza e malit, ujku, ariu, derri i egër, shqiponja etj. E nëse vizitoni këto Bjeshkë do të gjeni edhe shumë stane të cilat jo vetëm do ju ofrojnë ngrohtësinë e mikpritjes shqiptare, por do ju bëjnë të shijoni prodhimet e djathit dhe bulmetin cilësor që përdoren shumë nga pushuesit për të marrë energjitë e nevojshme
Grupe të shumtë turistësh vendas dhe të huaj tashmë vizitojnë për çdo ditë këto bukuri.
Ne ishim bashkë me një grup djemsh që janë të apasionuar dhe e bëjnë shpesh si verës ashtu edhe dimrit.
Edlir Tuku është një inxhinier nga jugu i Shqipërisë. Megjithëse punon prej 6 vitesh në Dibër, ishte hera e parë që vizitonte Bjeshkët e Gramës, pasi kishte vizituar gjithë atraksionet turistike të Dibrës.
Bjeshkët e Gramës mund të vizitohen në të katër stinët e vitit. Nga maji deri në nëntor mund të vizitohen nga të gjitha moshat, ndërsa dimri kërkon pak më shumë përgatitje fizike dhe veshje pasi bora kalon mbi 2 metra në lartësinë e Bjeshkëve që shtrihen deri në 2350 m.
Për të arritur në Bjeshkët e Gramës mund të përshkoni disa itinerare. Një pjesë e rrugës përshkohet me makinë ndërsa për të parë monumentet natyrore të kësaj zone duhet ta përshkoni në këmbë.
Mali i Gramës me Bjeshkët e saj është i pasur me shumë monumente natyrore fantastike, nga të cilat përmendim Pasqyrat e Gramës, Karsta e Malit të Bardhë, Shllinasi i Vrenjtit, Bjeshka e Zonjave, si edhe liqeni i Gramës.
Pasqyrat e Gramës janë një bllok solid me gjatësi 500 m i gjatë dhe 200 m i gjerë, që shndrin si pasqyrë në lartësinë 1900 m. Quhen të tilla pasi në të reflektojnë shumë bukur rrezet e diellit duke të krijuar imazhin e një pasqyre.
Liqeni i Gramës është një tjetër monument mbresëlënës i këtyre bjeshkëve. Ndodhet në masivin e malit të Gramës në lartësinë mbi 2000 m. Ai është liqen akullnajor dhe ka ujë të kristaltë dhe të ftohtë, ku gjatë dimrit sipërfaqja e tij ngrin, shkruan Klan tv.
Të njëjtin grup e kemi shoqëruar edhe në dimër, për të sjellë jo vetëm pamjet dimërore, por edhe impresionet, përjetimet, edhe pse është më e lodhshme. Djemtë tregojnë se Bjeshkët e Gramës janë pista natyrore për skijim, ndaj ftojnë të gjithë ato të apasionuarit pas sporteve dimërore që t’i vizitojnë këto Bjeshkë.
