Shefi i Grupit Kuvendar të Lidhjes Demokratike të Kosovës, Arben Gashi, ka reaguar ndaj refuzimit të kryeministrit Albin Kurti të përgjigjet ndaj pyetjeve të opozitës, ndërsa ka theksuar se ky refuzim është shantazh dhe shkelje e Kushtetutës, raporton InLajmi.
Gashi ka adresuar kritika për sjelljen e kryeministrit, ndërsa është shprehur se ky është rasti i parë për sa kohë që ekziston parlamenti i Kosovës.
“Sot për herë të parë në parlamentarizmin e Kosovës, refuzon të përgjigjet pyetjeve të deputetëve të opozitës. Kjo është shkelje e rëndë e Kushtetutës dhe shantazh. Ky tentim për detyrim ndaj deputetëve është i papranueshëm. Po hyjnë në një sistem të paraparë. Sjellja e sotme është ogur i keq për demokracinë tonë. Është nivel i ri të demokracisë dhe me sjelljen e arrogancës e kryeministrit ne e lëshuam seancën”, u shpreh Gashi.
Tutje , Gashi ka kujtuar krizën në të cilën ndodhet vendi dhe për mungesën e votave në legjislativ.
“Dje kam thënë se vendi është në krizë. Pushteti nuk i ka numrat për të votuar marrëveshjet e thjeshta, nuk është problemi të opozita por të pushteti. Cila është zgjidhja. Qeveria t’i bëjë numrat, a zgjerohet koalicioni apo i kërkon deputetët që të kthehen, nuk na intereson. Kjo çështje i takon kryeministrit Albin Kurti”, theksoi Gashi.
Gashi foli edhe për deklaratat e Albin Kurtit se nëse “shkojmë në zgjedhje, zhduket opozita”.
“Ani more le të zhduket. Nëse është vullnet i popullit që të zhdukjet opozita, atëherë vazhdojmë. Nuk është problem se Albin Kurti ka për synim t’i zhdukë kundërshtarët. Sot i ka bërë katër vjet qeverisje, cili është rezultati i këtij pushteti”, deklaroi deputeti Gashi.
