Kryetari i Asociacionit të Komunave të Kosovës Agim Aliu, në takim me kryeministrin Albin Kurti ka parashtruar një mori kërkesash, raporton InLajmi.
Fillimisht Aliu kërkoi të ndryshojë tradita e moskonsultimit si dhe qasja komunikuese, nga ana e Ministrive të Qeverisë së Republikës së Kosovës.
Ai bëri të ditur se komunat nuk janë konsultuar sa i përket për Ligjit për Vetëqeverisjen Lokal si dhe për procesin e amendamentimit të Ligjit për Tatimin në Pronë, ndërsa theksoi se sipas planifikimeve për vitin 2024, tavanet e caktuara nga Ministria e Financave kanë bërë që të ketë shkurtime të ndjeshme në buxhetet komunale, në kategorinë e investimeve kapitale.
“Ne, Kryetarët e Komunave, kemi bindjen se duhet të ndryshoj tradita e moskonsultimit si dhe qasja komunikuese, duke investuar në një raport komunikimi cilësor nga ana e Ministrive të Qeverisë së Republikës së Kosovës, për propozimet për ndryshime apo miratime të nismave të ndryshme legjislative, të cilat afektojnë drejtpërdrejt pushtetin lokal”, u shpreh Aliu, ndërsa theksoi se për amandamantimin e Ligjit për Tatimin mbi pronë, komunat janë anashkaluar. .
“E tillë ishte edhe qasja për Ligjin për Vetëqeverisjen Lokal si dhe për procesin e amendamentimit të Ligjit për Tatimin në Pronë, për të cilën Asociacioni i Komunave të Kosovës, rrjedhimisht Kryetarët e Komunave, u përjashtuan nga konsultimi, përkatësisht vendimmarrja e përbashkët, kur mirëfilli dihet se ky ligj në gjendjen aktuale, dëmton në vlera milionëshe buxhetin e komunave, duke cenuar kështu edhe autonominë financiare të komunave e në këtë kuptim edhe përgjegjësitë komunale, duke derivuar të hyra më të pakta për komunat, zvogëlim të mundësisë për zhvillim të projekteve që bazë financimi kanë këtë burim”, theksoi Aliu.
Ai përmendi edhe shkurtimet buxhetore të komunave me theks tek investimet kapitale.
“Edhe në pikëpamje të planifikimeve buxhetore për vitin 2024, tavanet e caktuara nga Ministria e Financave, Punës dhe Transfereve kanë bërë që të ketë shkurtime të ndjeshme në buxhetet komunale, në kategorinë e investimeve kapitale, që përcakton vitin 2024, me më pak investime kapitale”, deklaroi Aliu, duke besuar se qeveria do të ketë parasysh kërkesat e parashtruara..
“Ne, Kryetarët e Komunave në Asociacionin e Komunave të Kosovës, jemi besimplotë se kërkesat tona, propozimet tona, nevojat që ka pushteti lokal në gjithë Kosovën, do të kenë vëmendjen tuaj, do të marrin adresimin e duhur institucional, duke qenë aleatë në vizionin për t’i shërbyer më mirë, bashkëqytetarëve tanë”,
tha Aliu.
